Инфантино устидан Халқаро Олимпия қўмитасига шикоят қилинди

Халқаро Олимпия қўмитаси (ХОҚ) FIFA президенти Жанни Инфантинонинг АҚШ Президенти Дональд Трамп билан муносабатларида сиёсий бетарафлик тамойилини бузгани ҳақида расмий шикоят қабул қилди. Бу ҳақда ESPN хабар берди.

Маълум қилинишича, инсон ҳуқуқлари билан шуғулланувчи FairSquare нодавлат ташкилоти Инфантино 2020 йилдан буён ХОҚ аъзоси сифатида Олимпия хартияси ва ХОҚнинг Ахлоқ кодексини бир неча марта бузганини таъкидлаган. Шикоятда, жумладан, АҚШ терма жамоаси ҳужумчиси Фоларин Балогун иши ҳам тилга олинган.

“Жанни Инфантино АҚШ Президенти Дональд Трампга сиёсий қўллаб-қувватлов кўрсатиш орқали ХОҚнинг сиёсий бетарафлик қоидаларини бир неча бор бузган”, дейилади FairSquare баёнотида.

Эслатиб ўтамиз, аввалроқ FIFA Интизом қўмитаси АҚШ терма жамоаси ҳужумчиси Фоларин Балогуннинг дисквалификациясини вақтинча тўхтатиб, унга Жаҳон чемпионатининг 1/8 финалида Бельгияга қарши баҳсда иштирок этишга рухсат берган эди.

Оммавий ахборот воситаларида тарқалган маълумотларга кўра, бу қарор FIFA президенти Жанни Инфантино Оқ уйдан қўнғироқ олганидан кейин қабул қилинган. Кейинроқ Дональд Трамп ҳам Инфантинога қўнғироқ қилганини ва Балогун масаласини қайта кўриб чиқишни сўраганини тасдиқлаган.

ХОҚ Олимпия ҳаракатининг асосий тамойилларидан бири сифатида сиёсий бетарафликни эътироф этади. Инфантино эса 2020 йилдан бери ХОҚнинг 100 нафардан ортиқ аъзодан иборат эксклюзив таркибига киради ва ташкилотнинг Ахлоқ кодекси талабларига бўйсунади.