Инфантино мундиал вақтида Ер экваторини икки марта “айланди”

FIFA президенти Жанни Инфантино 2026 йилги Жаҳон чемпионати давомида АҚШ, Канада ва Мексикада бўлиб ўтган 40 дан ортиқ учрашувни бевосита стадиондан томоша қилди ҳамда у бунинг учун жами қарийб 93 минг километр масофани босиб ўтди. Бу Ер экватори узунлигидан қарийб икки баравар кўпдир. Бу ҳақда “Bloomberg” хабар берди.

Қайд этилишича, Инфантино “Qatar Airways” томонидан бошқариладиган ва FIFA маблағлари ҳисобидан молиялаштириладиган бизнес самолётидан фойдаланган. Жаҳон чемпионати давомида у 13 марта бир куннинг ўзида икки учрашувни томоша қилган. Айрим ҳолларда бу ўйинлар турли шаҳарлар, ҳатто турли мамлакатларда ўтказилган.

Унинг энг узоқ сафари жорий йилнинг 26 июнь кунига тўғри келган. Ўша куни Инфантино Филаделфиядаги Кот-д’Ивуар – Кюрасао учрашувидан сўнг тунги рейс билан Майамига, у ердан Иордания терма жамоаси иштирокидаги баҳсни кузатиш учун Далласга, кейин эса Миср – Эрон ўйинини томоша қилиш учун Сиэтлга йўл олган. Учрашувдан кейин эса яна Майамига қайтган. Ушбу сафарнинг умумий масофаси қарийб 9 минг километрни ташкил этган.

“FlyUSA” хусусий авиакомпанияси бош директори Барри Шевлиннинг таъкидлашича, мазкур йўналиш бўйича ёқилғи харажатлари 350 минг доллардан ошиши мумкин. Шунингдек, ушбу парвозлар натижасида атмосферага чиқарилган карбонат ангидрид миқдори ўртача 40 нафар америкаликнинг бир йиллик углерод изига тенг.

Маълумот ўрнида, 2022 йил Қатарда бўлиб ўтган Жаҳон чемпионатида Инфантино турнирнинг барча 64 та учрашувида иштирок этган эди. Бу йилги мундиалда эса мусобақа уч мамлакат ҳудудида ўтказилгани боис, унинг сафарлари ва босиб ўтган масофаси янада ортган.