Индонезияда болалар Президент ташаббуси билан тарқатилган овқатдан заҳарланди

Кеча, 14 август куни Индонезиянинг Марказий Ява вилояти Сраген шаҳрида Президент Прабово Субианто ташаббуси билан жорий этилган бепул мактаб тушлигидан 360 дан ортиқ киши заҳарланди. Бу ҳақда “Independent” хабар берди.

Қайд этилишича, жорий йилнинг январидан бери амалга оширилаётган бепул мактаб тушлиги дастури архипелагдаги турли жойларда оммавий заҳарланишга сабаб бўлиб, жами мингдан ортиқ одамга таъсир қилган. Сраген ҳокими Сигит Памунгкаснинг айтишича, 365 кишини заҳарлаган овқат намунаси лабораторияга юборилган ва зарурат бўлса, даволаниш харажатлари ҳукумат томонидан қопланади. Расмийларнинг айтишича, бу бепул овқат дастурида ҳозиргача қайд этилган энг йирик заҳарланиш ҳолати ҳисобланади.

Маҳаллий ўрта мактаб ўқувчиларидан бири кечаси қорин оғриғи, бош оғриғи ва диарея билан уйғонганини, ижтимоий тармоқларда синфдошлари ҳам худди шундай шикоятлар қилганини кўргач, бу овқатдан заҳарланиш эканини англаганини билдирган. Тушлик таркибида гуруч, омлет бўлаклари, бодринг ва салат, олма бўлаклари ҳамда сут бўлган. Бу овқат марказий ошхонада тайёрланиб, бир неча мактабга тарқатилган.

“Лаборатория натижалари чиқмагунча, ўша ошхонадан овқат тарқатишни вақтинча тўхтатишни сўрадик”, дейди Сигит.

Дастурга масъул бўлган Миллий овқатланиш агентлиги раҳбари Дадан Ҳиндаяна аввалги заҳарланиш ҳодисаларидан сўнг ошхоналар фаолияти ва етказиб бериш жараёнларида стандартлар оширилганини билдирган.

Кўп миллиард долларлик бу сиёсат Прабовонинг сайловолди кампаниясида асосий дастур ҳисобланади. Президент аҳолининг турмуш сифатини ошириш ва иқтисодий ўсишни рағбатлантиришини айтмоқда.

Бепул овқат дастури ҳозиргача 15 миллиондан ортиқ кишини қамраб олган, йил охирига бориб эса 83 миллион одамга етказиш режалаштирилган. Шу йил учун дастурга 10,62 млрд доллар ажратилган. Январь ойида бутун мамлакат бўйлаб 190 га яқин ошхона, жумладан ҳарбий қисмлар ҳузуридаги ошхоналар ҳам ишга туширилган.

Бундан олдин, жорий йилнинг май ойида Ғарбий Ява вилоятидаги шаҳарда юз берган заҳарланиш ҳодисасида 200 дан ортиқ ўқувчи жабрланган. Лаборатория текширувлари овқатда Salmonella ва E.coli бактериялари борлигини аниқлаган.

Эслатиб ўтамиз, аввалроқ Ироқда 621 нафар зиёратчи хлордан заҳарланиши оқибатида шифохонага ётқизилгани хабар қилинганди. Ҳодиса мамлакатнинг марказий ва жанубий қисмида жойлашган Нажаф ва Карбало шаҳарлари ўртасидаги йўлда юз берган.