Имкониятимдан юз фоиз фойдаланишга ҳаракат қиламан – Файзуллаев

Ўзбекистонлик футболчи Аббосбек Файзуллаевга ЦСКАнинг Факелга қарши ўйинидан олдин ҳеч ким унга майдонга тушишини айтмаган. Бу ҳақда Файзуллаев “Chempionat.com”га маълум қилди.

Файзуллаев “армиячилар” сафида дебют қилиш имкониятини кутаётганини айтди.

“Факел” билан ўйинда ҳамма ҳаракат қилди, ҳамма борини берди. Биз имкониятларимиздан фойдалана олмадик. Ўйин олдидан менга эҳтимолий дебют ҳақида ҳеч нарса айтилмаганди. Имкониятимни кутаман ва ундан юз фоиз фойдаланишга ҳаракат қиламан. Стадиондаги муҳит жуда ажойиб. Айниқса, мухлисларимиз”, дейди Аббосбек Файзуллаев.

Шунингдек, Аббосбек ЦСКАга кўчиб ўтиши бироз чўзилганини айтиб ўтди.

“Мен ҳамма нарса тезроқ тугашини, барча ҳужжатларни ҳал қилинишини кутдим. Трансфер бўлишимдан олдин кўпчилик билан маслаҳатлашдим. Кейинроқ ЦСКАни танладим”, дейди футболчи.

19 ёшли Файзуллаев “Пахтакор” тарбияланувчиси ҳисобланади. Ушбу мавсумда вингер 6 та ўйинда майдонга тушиб, 2 та гол урди ва 1 та голли узатмани амалга оширди.