Илк бор Ўзбекистоннинг 2 та олийгоҳи дунё университетларининг ТОП-1000 талигига кирди

Бугун, 5 июнь куни Буюк Британиянинг нуфузли QS Quacquarelli Symonds халқаро рейтинг агентлиги дунёдаги энг яхши университетлар рейтинги – QS World University Rankings -2025 натижаларини эълон қилди. 

Рейтингдан биринчи марта Ўзбекистоннинг бирваракайига икки олий таълим муассасаси – Тошкент ирригация ва қишлоқ хўжалигини механизациялаш муҳандислари институти Миллий тадқиқот университети 547-ўрин ҳамда Мирзо Улуғбек номидаги Ўзбекистон Миллий университети 781–790-ўрин билан муносиб жой эгаллади.

ТИҚХММИ Миллий тадқиқот университети QS Quacquarelli Symonds халқаро рейтинг агентлиги методологиясининг тўққиз кўрсаткичидан олтитасида юқори кўрсаткичларни намоён этди. Академик нуфуз кўрсаткичи бўйича дунёнинг энг яхши 300 та олий ўқув юртлари қаторига ва Марказий Осиёдаги энг яхши университетлар учлигига кирди.

Хусусан, рейтингнинг "Ўқитувчи–талаба нисбати" кўрсаткичи (144-ўрин) бўйича дунёнинг 200 та энг яхши университетлари қаторидан жой олди. "Академик нуфуз" индикаторида эса ТИИИМШ 290-ўринни эгаллаб, Марказий Осиё минтақасида учинчи ўринга сазовор бўлди, "Иш берувчилар ўртасидаги нуфузи" индикатори бўйича 456-ўринни олди.

Маълумот учун, QS Quacquarelli Symonds глобал олий таълим сектори учун хизматлар, тадқиқот ва таҳлиллар тақдим этувчи дунёдаги етакчи рейтинг агентлиги бўлиб, университетлар самарадорлигини қиёсий таққослаш орқали маълумотлар тақдим этувчи дунёдаги энг машҳур манба ҳисобланади.