Грузиянинг ҳукмрон партияси Саакашвилини клиникадан қамоқхонага юборишга чақирди

Грузиянинг собиқ президенти Михаил Саакашвили жазо муддатини қамоқда ўташи ва Вивамед хусусий клиникасида қолмаслиги керак, чунки у оғир хасталиклардан азият чекаётгани йўқ. Бу ҳақда ҳукмрон “Грузия орзуси – Демократик Грузия” партияси раиси Ираклий Кобахидзе маълум қилди. 

“Менимча, Саакашвили ҳаддан ташқари қулайликларга эга, чунки унинг тегишли касалликлари йўқлигидан келиб чиқиб, шифохонага ётқизмаслик керак, деб ўйлайман. Бу менинг шахсий баҳолашим, аммо бу мавзу бўйича қарорлар тегишли идоралар томонидан қабул қилинади”, деди Кобахидзе. 

Аввалроқ “Грузия учун” мухолифат партияси Грузия Адлия вазирлигини Саакашвилини қамоқхонага қайтаришга чақирган эди, чунки у клиникадаги суд мажлисларига масофавий боғланиб, сиёсий баёнотлар бериб, партиявий ташвиқот олиб бормоқда, бу эса кўриб чиқилаётган ишларга тааллуқли эмас. 

Грузия Адлия вазири Рати Брегадзе Саакашвилининг соғлиғи сўнгги пайтларда яхшилангани ҳақида бир неча бор таъкидлаган, бироқ “Вивамед” клиникаси тегишли тавсиянома бергандагина у қамоқхонага қайтарилади.

Маълумот учун, Саакашвили 2013 йилда Грузияни тарк этган, шундан сўнг мамлакатда унга қарши тўртта жиноий иш очилган, шундан иккитасида сиёсатчи сиртдан уч ва олти йиллик қамоқ жазосига ҳукм қилинган. 2021 йил октябрь ойида Саакашвили Грузияга яширинча келганида ҳибсга олинган. 2022 йил май ойида соғлиғи ёмонлашгани сабабли у Тбилисидаги "Вивамед" хусусий клиникасига олиб ўтилган ва у шу кунгача ўша ерда қолмоқда. Грузия расмийлари Саакашвили қамоқдан чиқиш учун касалликни "ёқиб олган", дея ҳисобламоқда.

Эслатиб ўтамиз, жорий йилнинг 3 июль куни Саакашвили Тбилиси шаҳар судининг 2007 йилдаги митингни тарқатиб юбориш иши бўйича йиғилишида шифохонадан видеоалоқа орқали иштирок этганди. Видеода собиқ президент озиб кетгани кўринади. Кейинроқ Украина Президенти Владимир Зеленский Ташқи ишлар вазирлигига Грузия элчисига қўнғироқ қилиб, Украина фуқаролигига эга бўлган Саакашвили масаласи бўйича маслаҳатлашиш учун 48 соат ичида мамлакатни тарк этиш ҳақида буйруқ беришни топширди. Грузия Ташқи ишлар вазирлиги Киев қарорини дипломатик муносабатларни кескинлаштириш, шунингдек, суверен давлатнинг ички ишларига аралашишнинг экстремал шакли деб атади.