Грузияда 70 минг ўринли янги стадион қурилади. Мамлакат 2028 йилги ЕЧЛ финалини қабул қилмоқчи

Грузия ҳукумати Тбилисида 70 минг томошабинга мўлжалланган, Европа Чемпионлар лигаси (ЕЧЛ) финали даражасидаги ўйинларни ўтказишга қодир футбол стадиони қуради. Бу ҳақда Грузия бош вазири Ираклий Кобахидзе маълум қилди.

“Биз спортга, аниқроғи футбол ва регбига тегишли бўлган муҳим мега лойиҳани эълон қилмоқчимиз. Объект 70 минг томошабинга мўлжалланган стадион бўлади. Бу бизга пойтахтимизда энг юқори даражадаги ўйинларни, жумладан Европа Чемпионлар лигаси финалини ўтказиш имкониятини беради”, дейди Кобахидзе.

Бош вазирнинг сўзларига кўра, стадион инглиз модели бўйича, яъни югуриш йўлакларисиз қурилади, бу эса томошабинларнинг футбол майдонига яқинроқ бўлишига имкон беради. Стадионни пойтахт четидаги янги халқаро аэропортга туташ ҳудудда қуриш режалаштирилган бўлиб, у 2028 йил охиригача илк йўловчиларини қабул қила олади. 

“Биз 2028 йилги Европа Чемпионлар лигаси финалини янги стадионда ўтказиш учун ариза берамиз”, дейди Кобахидзе.

Кобахидзе апрель ойи бошида республика ҳукумати Тбилисида сезиларли даражада кўпроқ йўловчиларни қабул қила оладиган янги халқаро аэропорт қуриш бўйича якуний қарорга келганини айтди. У Вазиани шаҳрида, шаҳар чеккасида, мавжуд халқаро аэропортдан бир неча километр узоқликда жойлашган бўлиб, янгиси ишга туширилгандан сўнг фуқаролик рейслари учун ёпиқ бўлади. Қурилиш 2029 йилгача якунланиши режалаштирилган.

Грузиядаги энг катта стадион ҳам Тбилисида жойлашган “Динамо Арена” бўлиб, сиғими 54 мингдан ортиқ томошабинга мўлжалланган. Ушбу стадион 1936 йилда қурилган ва бир неча марта таъмирланган. Айнан шу стадионда одатда миллий футбол ва регби жамоаларининг ўйинлари ўтказилади. Регби Грузиядаги иккинчи энг машҳур жамоавий спорт тури. Шунингдек, Тбилисида Михаил Месхи номидаги 27 мингдан ортиқ кишини сиғдира оладиган стадион мавжуд.