Гренландиянининг тахминий нархи айтилди

Табиий ресурсларини ҳисобга олган ҳолда Гренландиянинг тахминий қиймати 1 триллион долларгача етиши мумкин, бироқ АҚШ Данияга орол учун 70 миллиард доллардан ортиқ таклиф қилиши эҳтимолдан йироқ. Бу фикрни Столипин номидаги Иқтисодий ўсиш институти ижрочи директори Антон Свириденко ТАСС билан суҳбатда билдирди.

Мутахассиснинг эслатишича, 1946 йилда АҚШнинг 33-президенти Гарри Трумэн Гренландияни 100 миллион долларга сотиб олишни таклиф қилган. Бу жуда кичик сумма, чунки оролнинг фақат табиий ресурсларигина 4 триллион долларга баҳоланади.

“Шу сабабли Гренландиянинг реал нархи 1 триллион доллардан юқори. Бу эса Қўшма Штатлар тўлашни истамайдиган сумма”, дейди Свириденко.

Экспертнинг фикрича, Гренландия масаласида “оддий мажбуран тортиб олиш” сценарийси ҳам ишга тушиши мумкин. Шу билан бирга, у Гренландияни куч билан эгаллашга нафақат Европада, балки АҚШнинг ўзида ҳам қаршилар борлигини қайд этган.

Маълумот учун, Россия империяси 1867 йилда Қўшма Штатларга Аляскани 7,2 миллион доллар эвазига сотиб юборган. Бу сумма 2024 йил нархида тахминан 132 миллион долларга тенг. Ўша йилнинг 15 майида АҚШ Сенати 30 март куни имзоланган икки томонлама шартномани ратификация қилган ва Америка суверенитети 18 октябрь куни бутун ҳудуд бўйлаб ҳуқуқий жиҳатдан кучга кирган.

Эслатиб ўтамиз, аввалроқ Европа давлатлари Гренландия масаласида АҚШ билан тўғридан тўғри қарама-қаршиликка тайёргарлик кўраётгани ҳақида хабар берилган эди.