Гренландия Трамп билан боғлиқ нефть компаниясига “қатъий огоҳлантириш” берди

Гренландия ҳукумати АҚШ Президенти Дональд Трамп билан боғлиқ нефть компанияси маҳаллий ҳокимиятдан рухсат олмасдан қидирув-бурғилаш ускуналарини ҳудудга олиб кирганидан сўнг “қатъий огоҳлантириш” берди. Бу ҳақда “The Guardian” хабар берди.

Қайд этилишича, Техасда 2025 йилда ташкил этилган Greenland Energy компанияси Гренландиянинг шарқий соҳилидаги Жеймсон-Лэнд ҳудудида нефть қидириш учун иккита қудуқ бурғилашни режалаштирмоқда. Компания бу лойиҳага 60 миллион доллар сарфлашини ва ҳудуд остида 1 триллион долларлик хом нефть захираси бўлиши мумкинлигини билдирган.

Бироқ Гренландия ҳукумати компанияга бурғилаш ускуналарини соҳилга тушириш учун рухсат берилмаганини маълум қилган. Ҳукумат “Барча келгуси логистика ишлари амалга оширилишидан олдин минерал ресурслар органига маълум қилиниши ва тасдиқланиши керак”, дея огоҳлантирган.

Маълум қилинишича, июль ойида маҳаллий аҳоли Жеймсон-Лэнд соҳилига баржа орқали 12 та контейнер олиб келинганини кўрган. Гренландия ҳукумати ускуналар Greenland Energy компаниясининг режалаштирилаётган нефть қидирув-бурғилаш ишлари учун олиб келинганини тасдиқлаган.

Компания раиси Ларри Светс лойиҳанинг АҚШ томонидан Гренландияни аннексия қилиш режаларига алоқаси йўқлигини айтган. У компания вакили июнь ойида маҳаллий йиғилишда ускуналарни олиб кириш учун рухсат борлигини нотўғри айтганидан кейин “лойиҳага бўлган қизиқишимиз чалкашлик келтириб чиқарадиган тарзда мулоқот қилишимизга сабаб бўлди”, дея тан олган.

Гренландия 2021 йилда экологик сабабларга кўра янги нефть лицензияларини беришни тўхтатган. Шу билан бирга, Британиянинг 80 Mile компанияси Жеймсон-Лэндда қидирув ишларини олиб бориш ҳуқуқини олган ва Greenland Energy ушбу лойиҳанинг асосий улушини молиялаштириш эвазига қўлга киритишни режалаштирмоқда.

Нашрнинг ёзишича, Greenland Energy компанияси аввал иккита қудуқ бурғилашни режалаштирган бўлса, ҳозирча битта қудуқдан бошлашини билдирган. Компания Гренландия расмийлари билан сўнгги учрашувлар “конструктив” ўтганини ва бурғилаш учун зарур қолган рухсатларни олишда “ижобий силжиш” борлигини айтган.

Гренландия ҳукумати ускуналарни ҳудуддан олиб чиқишни талаб қилиш “мутаносиб бўлмаслигини” билдирган. Бурғилашга рухсат бериш бўйича ариза ҳозир кўриб чиқилмоқда. Greenland Energy вакили бурғилаш ускуналари ортилган кема 12 сентябрь куни Канададан йўлга чиқишини, қудуқларни бурғилаш эса октябрь ойида бошланишини айтган.

Трампнинг Гренландия бўйича вакили, Луизиана губернатори Жефф Лэндри эса ҳудуд келаси йил нефть қазиб чиқариши мумкинлигини билдирган.

Эслатиб ўтамиз, аввалроқ АҚШ Президенти Дональд Трамп Гренландия аҳолиси оролнинг Қўшма Штатларга қўшилиши учун овоз берадиган бўлса, ҳар бир фуқарога 1 миллион доллар миқдорида тўлов таклиф этиш имкониятини кўриб чиқаётгани хабар қилинганди.