Голливуд актёри билан боғлиқ фожианинг янги тафсилотлари ошкор қилинди

Голливуд актёри Алек Болдуин билан боғлиқ фожиали воқеадан бир неча кун олдин “Rust” (“Занг”) фильмининг суратга олиш гуруҳи жиддий ички келишмовчиликларга дуч келган. Бу ҳақда “Los Angeles Times” нашри хабар берган.  

Таъкидланишича, Болдуин тасодифан фильм оператори ва режиссёрини яралашидан бир неча соат олдин иш шароитига норозилик билдирган ҳолда, олти нафар ишчи суратга олиш майдонини тарк этган. 

Нашрнинг ёзишича, операторлар ва уларнинг ёрдамчилари иш ҳақи шартидан ҳам, мажбурий иш вақтидан ҳам норози бўлган. 

Манбаларга кўра, фильмни суратга олиш ишлари жорий йилнинг 6 октябрь куни бошланган. Тасвирга олиш гуруҳи аъзоларига Санта-Фе шаҳридаги меҳмонхонада яшаш учун пул тўлашга ваъда берилган, лекин аслида улар суратга олиш жойига етиб бориш учун ҳар куни тахминан 80 километр масофани босиб ўтишларига тўғри келган. 

Нашр оператор Галина Хатчинсни ўлдирган қуролдан бир неча марта ўқ узилганини ва фильмни суратга олиш пайтида хавфсизлик чоралари мунтазам равишда бузилганини даъво қилмоқда. 

“Марҳума Хатчинс ижодий гуруҳ учун хавфсизроқ меҳнат шароитлари тарафдорлари орасида бўлган”, дейилган манбаларда. 

Эслатиб ўтамиз, Голливуд актёри Алек Болдуин Нью-Мексико штатидаги Санта-Фе шаҳри яқинида бўлиб ўтаётган вестерн жанридаги "Rust" ("Занг") фильмини суратга олиш жараёнида тасодифан оператор Галина Хатчинс ва режиссёр Жоэл Соусни отиб қўйганди. Оқибатда 42 ёшда бўлган Галина Хатчинс олган жароҳатларидан вафот этган, 48 ёшли Жоэл Соус эса шифохонага ётқизилганди. 

Кейинчалик, Болдуин Галина Хатчинснинг ҳаётига зомин бўлган воқеани тергов қилишда полиция билан тўлиқ ҳамкорлик қилаётганини маълум қилди. У, шунингдек марҳумнинг оиласи билан алоқада эканини ва уларга ёрдам беришини айтди.