Германиянинг Исроил билан бирдамлиги муҳокама қилинмайди – Шольц
Олам
−
18 Ноябрь 2023 9024
Германия канцлери Олаф Шольц Берлин ва Анқаранинг Яқин Шарқдаги можаро бўйича қарашлари турлича эканини, шунинг учун ҳам юзма-юз учрашувлар муҳимлигини айтди. Бу ҳақда у кеча, 17 ноябрь куни Туркия Президенти Ражаб Тойиб Эрдўған билан ўтказган матбуот анжуманида сўз очди.
"Ҳеч кимга сир эмаски, бу можаро бўйича қарашларимиз ҳар хил, бутунлай бошқача деса ҳам бўлади", деган Шольц Эрдўғанга мурожаат қилиб.
"Германияни биладиган ҳар бир киши Исроил билан бирдамлик масаласи биз учун муҳокама қилинадиган мавзу эмаслигини тушунади. Исроил ўзини ҳимоя қилиш ҳуқуқига эга. Биз учун Исроилнинг мавжуд бўлиш ҳуқуқи инкор этилмайди", дейди Германия канцлери.
Шу билан бирга, Шольц ҳар бир ҳаёт бирдек қадрли эканини айтган ва Ғазода фаластинлик тинч аҳолининг азобланишидан қайғуда эканини билдирган.
Эслатиб ўтамиз, Эрдўған 27 октябрь куни Истанбулда Фаластинни қўллаб-қувватлаш учун ўтказилган митингда сўзга чиқиб, Анқара Ғазодаги операция учун Исроилни ҳарбий жиноятчи деб эълон қилишини айтиб, бунинг учун тўлиқ жавобгарликни Ғарб ўз зиммасига олишига ишора қилганди.
