Германияга айрим мигрантларнинг оила аъзолари киритилиши тўхтатилди

Германия парламенти – Бундестаг бугун, 27 июнь куни чекланган ҳимоя мақомига эга бўлган қочқинларнинг оила аъзоларини Германияга олиб келиш амалиётини икки йилга тўхтатди. Бу ҳақда “Deutsche Welle” хабар берди.

Йилига 12 минг нафаргача оила аъзолари учун киритилган бу чеклов Германияга мигрантлар оқимини камайтириш чораларидан бири сифатида кўрилмоқда. Ички ишлар вазири Александр Добриндтнинг таъкидлашича, бу қадам ижтимоий тизимлар ва уй-жой бозоридаги юкни камайтиришга хизмат қилади.

Қонун лойиҳаси Бундестагда 444 овоз билан қабул қилинган, унга фақат 135 депутат қарши чиққан. 

Добриндт мигрант оилаларининг Германияга кўчиб келиши жиноий гуруҳлар учун даромад манбаига айлангани, янги қонун эса бундай бизнес-моделга барҳам беришини айтган. У миграция соҳасида туб ўзгаришлар учун фақат бир қонун кифоя эмаслигини, комплекс чоралар зарурлигини урғулаган.

Ҳуқуқ ташкилотлари ва черковлар қонунни танқид қилган. “Pro Asyl” ташкилоти бу қонун минглаб одамларни йиллаб ўз оиласидан ажратишга олиб келишини айтган. 

Эслатиб ўтамиз, аввалроқ Германия Бундестаги депутати, Христиан-демократлар иттифоқи аъзоси Родерих Кизеветтер Россия ва Германия ўртасидаги муносабатларни янада кескинлаштириш учун барча россиялик дипломатларни мамлакатдан чиқариб юборишни ва Берлиндаги “Рус уйини” ёпишни таклиф қилганди.