Германияда Boeing самолётининг шассиси синиб кетди (видео)

Бугун, 4 июнь куни Германиянинг Франкфурт аэропортида Boeing 787 Dreamliner самолёти йўловчиларни тушириш жойига етиб борганидан сўнг унинг олд шассиси синиб кетди. Оқибатда бир неча киши жабрланди. Бу ҳақда “Spiegel” хабар берди.

Қайд этилишича, ҳодиса кундузи Франкфурт аэропортида рейс якунланганидан кейин содир бўлган. Boeing 787 Dreamliner йўловчиларни тушириш жойида турган бўлган, ўша пайтда тўсатдан унинг олд шассиси ишдан чиққан. Оқибатда самолётнинг бурун қисми кескин пастга тушиб кетган, учувчилар кабинаси эса ерга урилган. Дастлабки маълумотларга кўра, ҳаво кемаси жиддий шикастланган.

Ҳодиса юз берган вақтда бортда йўловчилар бўлмаган. Самолёт ичида фақат экипаж аъзолари ва аэропортнинг ерусти хизмати ходимлари бўлган.

Lufthansa вакилининг маълум қилишича, бир нечта ишчи жароҳат олган. Уларга зарур тиббий ёрдам кўрсатилган. “FlightRadar24” маълумотларига кўра, лайнер Франкфуртдан Лос-Анжелесга учиши керак бўлган. Самолёт 2025 йилда ишлаб чиқарилган бўлиб, ундан фойдаланиш 2026 йилнинг февраль ойида бошланган.

Ҳодиса сабаблари ҳозирча номаълум. Мутахассислар юз берган воқеа техник носозлик билан боғлиқми ёки инсон омили туфайлими, бунга ойдинлик киритиши зарур.

Эслатиб ўтамиз, аввалроқ  Қозоғистоннинг Павлодар вилоятида авиация-кимёвий ишларни бажараётган Ан-2 самолёти ҳалокатга учраганди. Ҳодиса оқибатида 1 киши ҳалок бўлган.