Ғазодаги уруш тугади – ҲАМАС

Ғазо секторидаги уруш ўз ниҳоясига етди ва минтақада тинчлик битими кучга кирди. Бу ҳақда ҲАМАС ҳаракатининг музокара гуруҳи вакили Ҳалил ал-Ҳайя ўз мурожаатида эълон қилди.

“Бугун биз урушнинг тўхтаганини ва доимий сулҳ бошланганини эълон қиламиз. Битимга кўра, Рафаҳ чегара пункти ҳар икки йўналишда очилади. Шунингдек, Исроил барча фаластинлик аёллар ва болаларни озод қилади. Биз Қўшма Штатлар, араб воситачилари ва Туркиядан Ғазода уруш бутунлай тугатилганига кафолат олдик”, деган ҳаракат вакили. 

“Al Jazeera” телеканалининг қўшимча қилишича, ҳаракат вакили Исроил қамоқхоналарида умрбод жазо ўтаётган 250 фаластинлик, шунингдек, уруш бошланганидан бери ҳибсга олинган тахминан 1700 ғазолик озод қилинишини билдирган. 

Изроил Вазирлар Маҳкамаси ҳали тинчлик битимини расман ратификация қилгани ҳақида маълумот бермаган. Бироқ “The Times of Israel” нашрининг ёзишича, бу қадамда энди жиддий тўсиқлар бўлиши кутилмаяпти.

Қайд этиш жоиз, 9 октябрь дунёдаги миллионлаб одамлар учун яхши хабар билан бошланди – Исроил ва ҲАМАС ҳаракати вакиллари икки йил деганда муқим келишувга эришди. Бу янгиликни дунёга биринчилардан бўлиб АҚШ Президенти Дональд Трамп эълон қилди. 

Битим Трамп маъмурияти таклиф қилган 21 бандлик режанинг биринчи босқичи ҳисобланади. У ўт очишни тўхтатиш, гаровдагилар ва асирларни алмашиш, Исроил қўшинларини Ғазодаги “сариқ чизиқ” деб аталувчи ҳудудгача олиб чиқишни ўз ичига олади. 

Келишув тафсилотларига кўра, гаровга олинган тирик одамларни топшириш жараёни Исроил ҳукумати томонидан битим маъқуллангандан 72 соат ўтиб бошланади. Ҳозирда ҲАМАС қўлида бўлган 48 кишидан тахминан 20 нафари тирик деб айтилмоқда. Шунингдек, Исроил армияси Ғазодан қўшинларини қисман олиб чиқишнинг биринчи босқичини битим имзоланганидан 24 соат ўтиб якунлаши керак.

Эслатиб ўтамиз, аввалроқ Ўзбекистон Республикаси АҚШ Президенти Дональд Трампнинг бевосита кўмагида Ғазо секторида ўт очишни тўхтатиш ва гаровга олинганларни озод этиш бўйича эришилган келишувни олқишлаганди. ТИВ баёнотида Ўзбекистон доимо халқаро ҳуқуқ меъёрлари ва БМТ Хавфсизлик Кенгаши резолюциялари асосида Яқин Шарқда мустаҳкам ва адолатли тинчлик ўрнатилишини қўллаб-қувватлаши қайд этилган.