Ғазо фаластинликларга тегишли – Нидерландия

north_east

Трампнинг Ғазони эгаллаш ғоясини дунё қандай қабул қилди?

Нидерландия Ташқи ишлар вазири Каспар Велдкамп АҚШ Президенти Дональд Трамп илгари сурган таклифга муносабат билдириб, Ғазо секторининг АҚШ назоратига ўтиши Нидерландия учун мутлақо қабул қилиб бўлмайдиган ғоя эканини айтди. Бу ҳақда у маҳаллий “Telegraaf” газетаси сўровига берган жавобида маълум қилди.

“Нидерландия учун Ғазо фаластинликларга тегишли экани ҳеч қандай шубҳасиз ҳақиқатдир. Бизнинг позициямиз ўзгармайди. Нидерландия икки давлат принципини қўллаб-қувватлайди. Бу эса хавфсиз Исроил давлати билан ёнма-ён яшайдиган мустақил ва ҳаётга лаёқатли Фаластин давлатини назарда тутади”, деди вазир.

Бу қараш ҳукумат коалициясига кирувчи “Озодлик партияси” етакчиси Герт Вилдерснинг позициясига зид. Унга кўра, фаластинликлар Иорданияга кўчиб ўтиши керак ва шунда Ғазо муаммоси ҳал бўлади. Ҳукумат коалициясининг бошқа етакчилари эса ҳозирча Трампнинг ташаббусига очиқ муносабат билдирмаган.

Эслатиб ўтамиз, 4 февраль куни Трамп Оқ уйда Исроил Бош вазири Биньямин Нетаньяху билан учрашувдан сўнг бўлиб ўтган қўшма матбуот анжуманида АҚШ Ғазо секторини узоқ муддатли бошқарувга олиш масаласини кўриб чиқаётганини эълон қилганди. Унинг таъкидлашича, бу минтақадаги тинчлик манфаатлари йўлида амалга оширилиши мумкин. Шунингдек, у Фаластин аҳолиси бошқа араб давлатларига кўчирилиши мумкинлигини ва бу жараённинг молиявий таъминоти минтақа мамлакатлари томонидан қопланишини айтди. Трамп зарурат туғилганда АҚШ ўз қўшинларини Ғазога киритишга тайёр эканини ҳам қўшимча қилди.

Трампнинг бу таклифи араб давлатлари, Эрон ва бир қатор ғарб мамлакатлари томонидан кескин рад этилди. Франция Ташқи ишлар вазирлиги ҳам Трампнинг режасига рози эмаслигини эълон қилди. Германия Ташқи ишлар вазири Анналена Бербок эса фаластинликларни Ғазодан мажбуран чиқариб юбориш қабул қилиб бўлмайдиган ҳаракат эканини билдирди.