AQSH G‘azodagi barcha variantlarni ko‘rib chiqadi – Pentagon

Pentagon G‘azodagi operatsiyalarda ishtirok etish uchun “barcha mumkin bo‘lgan variantlarni” ko‘rib chiqishga tayyor. Bu haqda kecha, 5 fevral kuni AQSH Mudofaa vaziri Pit Hegset ma’lum qildi.

Bu bayonot Prezident Donald Tramp Qo‘shma Shtatlar G‘azo sektorini nazorat ostiga olish va uni qayta qurishni boshlash istagini bildirganidan bir kun o‘tib yangradi.

“G‘azo haqida gap ketganda, jinnilikning ta’rifi bir xil narsani qayta-qayta qilishga urinish va boshqa natijani kutishdir. Prezident chegaradan tashqarida o‘ylashga, shu paytgacha hal qilib bo‘lmaydigandek tuyulgan muammolarni hal qilishning yangi, o‘ziga xos va dinamik yo‘llarini izlashga tayyor... Biz barcha variantlarni ko‘rib chiqishga tayyormiz”, dedi Pentagon rahbari Isroil Bosh vaziri Binyamin Netanyaxu bilan uchrashishdan oldin.

Oq uyning aniqlik kiritishicha, Tramp AQSHning Falastin anklavida potensial nazorat o‘rnatish taklifi doirasida G‘azoga AQSH qo‘shinlarini yuborish bo‘yicha yakuniy qaror qabul qilmagan.

Trampning g‘oyasi ko‘plab mamlakatlar tomonidan qoralandi, shuningdek, Kongressdagi umuman Prezident tashabbuslarini, masalan, chet el yordamini to‘xtatish va federal agentliklarda katta qisqartirishlarni qo‘llab-quvvatlaydigan respublikachilar o‘rtasida ham bo‘linishni keltirib chiqardi.

Tramp bu rejani jiddiy amalga oshirish niyatidami yoki undan taktik muzokaralar vositasi sifatida foydalanmoqchimi, hozircha noaniq.

Hegsetning aytishicha, Pentagon Isroilga AQSH o‘z ittifoqchisiga ilgari bermagan qurollarni yetkazib beradi. Mudofaa vazirining so‘zlariga ko‘ra, bu qurollar Isroilning radikal raqiblarini yo‘q qilishda foydali bo‘lishi mumkin.

Tramp allaqachon sobiq demokratik prezident Jo Bayden tomonidan Isroilga 2000 funtlik bomba yetkazib berishga qo‘yilgan taqiqni bekor qilishni buyurgan edi. Har bir bunday bomba kuchli beton va metall konstruksiyalarga kirib, kuchli zarba to‘lqinini yaratishga qodir.

Bayden ma’muriyati o‘tgan yili 2023 yil 7 oktyabrda HAMAS hujumidan so‘ng Isroilga minglab shunday bomba jo‘natgan, biroq keyinchalik qurollarning jo‘natilishiga to‘sqinlik qilgan.