Францияда 17 яшар ўсмир отиб ташланиши ортидан 150 киши ҳибсга олинди

Францияда 17 ёшли ўсмирнинг ўлимидан сўнг бошланган тартибсизликлар фонида бир кечада 150 нафар киши ҳибсга олинди. Бу ҳақда Франция Ички ишлар вазири Жеральд Дарманен маълум қилди.

Келтирилишича, мамлакатнинг турли шаҳарларида, жумладан, Нантер, Лион, Лилл, Тулуза ва Вири-Шатиёнда бўлиб ўтган кенг кўламли намойишлар Наэл исмли ёш йигитнинг ўлимидан кейин алангалаган.

Франция матбуотига кўра, намойишчилар машиналар, чиқинди қутиларига ўт қўйиб, давлат мулкига зарар етказган. Тулуза ва Лилл шаҳарларида намойишчилар хавфсизлик кучлари ходимларига тош отган. Уларни тарқатиш учун ҳуқуқ-тартибот идоралари ходимлари кўздан ёш оқизувчи газ ишлатишга мажбур бўлган.

“Республика рамзларига қарши чидаб бўлмас тартибсизликда 150 нафар киши ҳибсга олинди”, деб ёзган Ички ишлар вазири Жеральд Дарманен.

Эслатиб ўтамиз, жорий йилнинг 27 июнь куни Парижга яқин Нантер шаҳрида 17 ёшли йигит йўл ҳаракати назорати вақтида полицияга бўйсунишдан бош тортгани учун отиб ўлдирилганди.