Франция терма жамоаси футболчиси ЖЧ кубогини сотди

“Манчестер Сити” ва Франция миллий терма жамоасининг собиқ ҳимоячиси, айни пайтда Польшанинг “Погонь” клубида тўп сураётган Бенжамен Менди Жаҳон чемпионати кубоги нусхасини сотди. Бу ҳақда AS нашрининг хабар берди.

Манбага кўра, 2018 йилги Жаҳон чемпионати ғолиби бўлган футболчи совринни АҚШнинг Goldin аукцион уйи орқали ким ошди савдосига қўйган. Савдо жорий йилнинг 25 июль куни якунланган.

Жаҳон чемпионати кубогининг нусхаси 54 минг еврога сотилди. Бу сумма дастлабки кутилмалардан пастроқ бўлди. Сабаби, экспертиза давомида совриннинг таг қисмида ёриқ ҳамда кичик ейилиш излари аниқланган.

Харидорга кубок билан бирга Бенжамен Менди имзолаган ҳақиқийлик сертификати ҳам топширилган.

Маълумот учун, Менди фаолияти давомида “Гавр”, “Лорьян”, “Марсель”, “Монако”, “Манчестер Сити” ва “Цюрих” клублари шарафини ҳам ҳимоя қилган. У “Монако” билан Франция чемпионлигини қўлга киритган бўлса, “Манчестер Сити” сафида уч марта Англия Премьер-лигаси ва икки марта Англия Лига кубоги ғолиби бўлган.