Флоридада “Милтон” тўфонидан сўнг аллигаторлар уйларга кириб олди (видео)

АҚШнинг Флорида штатини қамраб олган ҳалокатли “Милтон” тўфонидан сўнг кўчалар ва уйларда аллигаторлар пайдо бўлди. Бу ҳақда WFLA хабар берди.

Улардан бири штатнинг Форт Майерс шаҳрида маҳаллий аҳолининг машинасига ҳужум қилган. Кадрларда аллигатор сув остига қайтишдан олдин камида бир неча марта шинани тишлаганини кўриш мумкин. Ижтимоий тармоқларда гувоҳлар томонидан олинган видеолардан бирида эса сув босган уйлардан бирида аллигатор юргани акс этган.

Флорида Балиқ ва ёввойи табиатни муҳофаза қилиш комиссиясига кўра, аллигаторларни штатнинг ҳар бир округида топиш мумкин. Шу сабабли расмийлар бундай вазиятда зудлик билан ишонч телефонига қўнғироқ қилишни маслаҳат берган. Соҳил бўйлаб энг кўп зарар кўрган ҳудудларнинг расмийлари, шунингдек, флоридаликларни сув босган йўллардан узоқроқ туришга чақирган.

“Кўпгина флоридаликлар аллигаторлар билан бирга яшашни ўрганган бўлсалар ҳам, юзага келиши мумкин бўлган муаммолар сақланиб қолмоқда”, дея таъкидлаган комиссия.

Довул қурбонлари ва жароҳатланганларни қидириш ишлари давом этмоқда. Штат губернатори Рон ДеСантиснинг сўзларига кўра, 10 октябрь оқшомига қадар табиий офат ҳудудидан 340 киши ва 49 уй ҳайвонлари қутқариб олинди. Ҳозирги вақтда “Милтон” пост-тропик циклон сифатида таснифланади. 10 октябрга ўтар кечаси, довул Сарасота округига етиб келганида, Миллий довул маркази уни 3-тоифали довул деб таснифлади. Кейинчалик, у штат бўйлаб ҳаракатланар экан, у 1-тоифага заифлашди, аммо бўрон сифатидаги мақомини сақлаб қолди.

Эслатиб ўтамиз, аввалроқ “Милтон” тўфони камида 11 кишининг ҳаётига зомин бўлгани хабар қилинганди. Сент-Люси ва Цитрус округларида, шунингдек, Ормонд-Бич ва Санкт-Петербург шаҳарларида яшаган 10 киши ҳалок бўлган. Бироз вақт ўтгач, Тампа шаҳрида қутқарувчилар яна бир қурбон – тахминан 70 ёшли аёлнинг жасадини топгани маълум бўлди.