Фицо Путиндан кейин Зеленский билан учрашди

Бугун, 5 сентябрь куни Словакия Бош вазири Роберт Фицо Украина Президенти Владимир Зеленский билан учрашиб, унга Хитойдаги музокаралар ҳақида маълумот берди. Бу ҳақда Украина раҳбари ўзининг Telegram-каналида ёзиб қолдирди. 

Учрашувда томонлар учун муҳим бўлган асосий масалалар муҳокама қилинган. Зеленский АҚШ Президенти Дональд Трамп билан бўлган суҳбат, “кўнгиллилар коалицияси” етакчилари билан тинчликка эришиш ва Украина хавфсизлигини таъминлаш бўйича олиб борилаётган ишлар ҳамда Европа учун хавфсизлик архитектураси ҳақида маълумот берган. Словакия эса бу жараёнда четда қараб турмаслиги, қўлдан келганча ёрдам беришини билдирган. Словакия Бош вазири Хитой билан алоқалар ҳақида сўзлаб берган.

Европанинг энергетик мустақиллиги масаласи ҳам алоҳида ва муҳим мавзу бўлган. Украина Президентининг даъво қилишича, у Фицога Россия нефти ва гази Европа учун келажакка эга эмаслигини уқтирган. 

“Словакия Украинани Европа Иттифоқига қўшилиш йўлида қўллаб-қувватламоқда, бу жуда муҳим қадрият сифатида баҳоланди. Украина ва Молдова Евроиттифоққа аъзоликка биргаликда интилиши зарурлиги таъкидланди. Шунингдек, минтақада иқтисодий, энергетик ва инфратузилма бўйича икки томонлама ҳамкорликни мустаҳкамлаш икки халқ ва икки давлат учун фойда келтириши қайд этилди”, дея ёзган Зеленский. 

Президент учрашув учун миннатдорлик билдириб, бу мулоқотни давом эттириш муҳимлигини таъкидлаган. 

Зеленский учрашув ҳақида қисқача маълумот берган бўлса-да, улар Россия билан муносабатлар, Кремлнинг кейинги қадамларини ҳам муҳокама қилган бўлиши мумкин. Ҳар холда Фицо Зеленскийнинг олдига қуруқ боргани йўқ. У 2 сентябрь куни Россия раҳбари Владимир Путин билан учрашган ва кераклича маълумот олган эди. 

Қайд этиш жоиз, Словакия ва Украина муносабатлари кескин совуқлашиб бораётган эди. Икки ўртадаги гина Украина Қуролли кучларининг “Дружба” нефть қувурига ҳужумлари сабабли юзага келди. Бу қувур орқали Россия нефти Марказий Европага етказиларди, аммо ҳужумлар туфайли баъзида етказиб бериш қисқа муддатларга тўхтаб қолди.

Эслатиб ўтамиз, жорий йилнинг 1 сентябрь куни Словакия Бош вазири Facebookʼда эълон қилинган видеомурожаатида яқин кунларда Хитой Раиси Си Цзиньпин, Россия Президенти Владимир Путин ва Украина раҳбари Владимир Зеленский билан учрашишни режалаштираётгани ҳақида айтганди. У ўз режасини тўлақонли бажарди ҳам.