Финляндия тиш-тирноғигача қуролланяпти: армия 1 млн дона мина сотиб олади

Финляндия Қуролли кучлари хавфсизлик соҳасидаги вазиятнинг ёмонлашуви фонида тахминан 100 миллион евро миқдорида бир миллион дона пиёдаларга қарши мина харид қилишни режалаштирмоқда. Бу ҳақда Yle хабар берди.

Қайд этилишича, арсенални тўлдириш 2028 йилгача якунланиши керак. Харид қилиш тўғрисидаги қарор қабул қилинишидан сал аввал республика Бош вазири Петтери Орпо Россияни Финляндия ва Европа хавфсизлигига узоқ муддатли таҳдид деб атаган.

Фин армиясининг пиёдаларга қарши миналар билан оммавий қуролланиш режаси Хельсинкининг ушбу турдаги воситаларни тақиқловчи Оттава конвенциясидан чиқиши ҳақидаги қонун январда кучга киргачгина амалга ошди.

Армия қўмондонлиги полковниги Рику Микконеннинг сўзларига кўра, мамлакатда мина ишлаб чиқаришга қодир ўнлаб компаниялар мавжуд бўлиб, армия ҳокимият мамлакат ичида ишлаб чиқаришни йўлга қўя олиши учун қурол-яроғларни улардан харид қилади.

Финляндия Оттава шартномасидан чиқиш жараёнини 2025 йилнинг июль ойидаёқ, Россия билан чегарадош бошқа мамлакатларга қўшилган ҳолда бошлаган. Бунгача Эстония, Литва, Латвия ва Польша ҳам худди шундай қадам ташлаган эди. 

Конвенциядан чиққандан сўнг дарҳол Финляндия Мудофаа вазирлиги раҳбари Антти Хакканен пиёдаларга қарши миналар ишлаб чиқаришни қайта йўлга қўйиш ва ҳарбий хизматчиларни улардан фойдаланишга ўргатишни эълон қилган. Бироқ у Хельсинки уруш олиб бориш қоидаларига риоя қилишда давом этишини, тинчлик даврида эса миналар фақат машғулотларда қўлланилиши ва омборларда сақланишини таъкидлаган.

Маълумот учун, Оттава конвенцияси 1999 йилда амал қила бошлаган. У пиёдаларга қарши миналарни ишлаб чиқариш, фойдаланиш, тўплаш ва беришни тақиқлайди, шунингдек, имзолаган мамлакатларга уларнинг захираларини йўқ қилиш мажбуриятини юклайди. Ҳаммаси бўлиб ушбу ҳужжатга 164 та давлат қўшилган.

Эслатиб ўтамиз, аввалроқ Финляндия Россия чегарасида умумий узунлиги 200 км бўлган чегара тўсиғини қуришни якунлагани ҳақида хабар берилган эди.