Эрондаги портлашда 20 га яқин одам ҳалок бўлди

Кеча, 25 апрель куни Эроннинг Бандар-Аббос шаҳри яқинидаги Шаҳид-Ражаи денгиз портида содир бўлган кучли портлаш оқибатида 18 киши ҳалок бўлди ва 750 дан ортиқ одам жароҳатланди. Бу ҳақда “Associated Press” хабар берди.

Маълум қилинишича, портда ракеталар учун қаттиқ ёқилғининг асосий таркибий қисми бўлган натрий перхлорат портлаб кетган. У айни Уммонда АҚШ ва Эрон ўртасида Теҳрон ядровий дастури бўйича музокараларнинг учинчи босқичи бошланганидан кўп ўтмай содир бўлган. Баъзи бир манбаларга кўра, портлаш уюштирилган бўлиши мумкин. Аммо бу ҳақда расмий маълумотлар мавжуд эмас.

“Ҳодисага Шаҳид Ражаи порти бандаргоҳи ҳудудида сақланаётган бир нечта контейнерларнинг портлаши сабаб бўлган. Ҳозирда эвакуация ишларини олиб боряпмиз ва ярадорларни тиббиёт марказларига олиб кетяпмиз”, деган Фавқулодда вазиятлар бошқармасининг маҳаллий вакили.

Порт фаолияти ёнғинни ўчириш учун тўхтатилган. 

Эрон ОАВ маълумотларига кўра, портлаш оқибатида бир неча километр радиусдаги ойналар синган, интернетда эса портлашдан кейин улкан тутун ҳосил бўлгани акс этган кадрлар пайдо бўлган.

Эрон Соғлиқни сақлаш вазирлиги ҳудудда фавқулодда ҳолат эълон қилиб, одамлардан биноларда қолиш, деразаларни ёпиш ва ниқоб тақишни сўраган.

Эрон Президенти Масъуд Пезешкиён мамлакат Ички ишлар вазири портлаш терговини назорат қилиш учун минтақага йўл олганини айтган. У портлаш оқибатида инсонлар ҳалок бўлгани муносабати билан чуқур ҳамдардлик билдирган.

Маълумот учун, Бандар Аббос Форс кўрфазининг Уммон кўрфази билан туташган жойида, Ҳурмуз бўғози қирғоғидаги стратегик муҳим нуқтада жойлашган. Портлар ва кемачилик ташкилоти маълумотларига кўра, бу порт Эрондаги энг йирик порт ҳисобланади. Ўтган йили у орқали мамлакатдаги контейнер ташишларнинг 85 фоизи, шунингдек, Эрон нефтининг катта қисми ўтган. 2020 йилда худди шу портдаги компьютерларга киберҳужум уюштирилган, бу эса сув йўллари ва объектга олиб борувчи йўлларда оммавий носозликларни келтириб чиқарган.

Эслатиб ўтамиз, кеча, 26 апрель куни Эрон ва АҚШ ўртасида Уммон пойтахти Маскатда билвосита музокараларнинг учинчи раунди бўлиб ўтган эди. Музокаралардан сўнг Эрон Ташқи ишлар вазири Аббос Ароқчи журналистларга интервью бериб, Маскатдаги учинчи раунд музокаралари олдингиларга қараганда анча жиддий ўтганини таъкидлаган. Бундан ташқари, у ўз баёнотида Шаҳид-Ражаи портида юз берган  ҳодиса муносабати билан ҳалок бўлганларнинг оила аъзоларига таъзия изҳор этган ва жароҳатланганларга ҳамдардлик билдирган эди.