Эрондаги намойишлар фонида интернет тўлиқ ўчирилди

Эронда 12 кундан бери давом этаётган оммавий норозилик чиқишлари фонида интернет сегментидаги трафик бутунлай ўчирилди. Бу ҳақда “Deutsche Welle” хабар берди.

Гувоҳларнинг сўзларига кўра, хавфсизлик кучлари ниқоб таққан намойишчиларга қарши кўздан ёш оқизувчи газ ишлатган. ОАВ тарқатган маълумотларга кўра, фаоллар жойлаган видеоларда Теҳронда ёниб турган полиция автомобиллари ҳам кўринади. Шунингдек, Машҳад, Кирмоншоҳ ва бошқа йирик шаҳарларда ҳам оммавий норозиликлар қайд этилган.

Британиянинг “NetBlocks” ташкилоти Эрон ҳукумати аҳолига интернетдан фойдаланишни тўлиқ чеклаганини маълум қилган. Мамлакат “деярли умумхалқ интернет узилиши” ҳолатига тушган. Cloudflare IT-компанияси маълумотига кўра, 8 январь куни Эрондаги интернет-трафик қарийб 90 фоизга камайган.
Тахминларга кўра, интернетдан эркин фойдаланиш фақат мансабдорлар ва куч тузилмалари вакилларида сақланиб қолган.

АҚШ Президенти Дональд Трамп “Salem News Channel” телеканалига берган интервьюсида Теҳрон раҳбариятига нисбатан аввал айтилган таҳдидларини яна такрорлаган. Унинг айтишича, агар Эрон ҳукумати намойишчиларни ўлдиришни бошласа, АҚШ кескин чоралар кўради. Трамп эронликларни “жасур халқ” деб атаган ва унинг маъмурияти вазиятни диққат билан кузатаётганини билдирган.

Норвегиянинг “Iran Human Rights” (IHR) ташкилоти маълумотларига кўра, норозиликлар бошланганидан бери камида 45 нафар намойишчи ҳалок бўлган, улар орасида саккиз нафар вояга етмаганлар ҳам бор. 

Маълумот учун, мамлакатда оммавий намойишлар 28 декабрдан буён давом этмоқда. Улар Теҳрондаги марказий бозорда бошланган бўлиб, кўплаб дўкон эгалари гиперинфляция ва нархларнинг кескин ошишига норозилик сифатида савдо шохобчаларини ёпган.

29 декабрь куни Эрон миллий валютаси – риял тарихий минимум даражага тушди: бир риял тахминан 0,00002 еврога тенг бўлди. Жаҳон банки маълумотига кўра, октябрь ойида Эронда озиқ-овқат инфляцияси 64,2 фоизни ташкил этган. Бу кўрсаткич бўйича мамлакатни антирейтингда фақат Жанубий Судан ортда қолдирган.

Эслатиб ўтамиз, кеча, 8 январь куни Эрон пойтахти Теҳрон яқинида яшаш харажатларининг ортиши  билан боғлиқ норозиликлар вақтида  полиция ходими пичоқлаб ўлдирилганди.