Эрондаги мақбарада теракт уюштирганликда гумонланган 4 киши қўлга олинди

Эроннинг Форс вилоятидаги Шоҳ Черах мақбарасида содир этилган терактга алоқадорликда гумон қилиниб, тўрт киши қўлга олинди. Бу ҳақда Форс вилояти бош прокурори Козим Мусевийга таяниб, “Entekhab” агентлиги хабар берди.

“Кечаги терактга алоқадорликда гумон қилинган тўрт нафар шахс қўлга олинди. Ҳужумни амалга оширган террорчини сўроқ қилиш давом этмоқда”, деган прокурор.

Эрон телевидениеси ҳужум учун жавобгарликни ИШИД террор ташкилоти ўз зиммасига олганини эълон қилган.

Маълумот учун, мазкур ҳолат Шоҳ Черах мақбарасидаги иккинчи терактдир. Ўтган йилнинг 26 октябрь куни мақбарага ҳужум уюштирилганди. Ҳужум оқибатида 13 киши ҳалок бўлган, 40 киши яраланган. 2023 йил 8 июль куни ҳужумга алоқадор икки киши қатл этилган. 

Эслатиб ўтамиз, кеча, 13 август оқшомида Шероз шаҳрида номаълум шахс Шоҳ-Черах мақбарасига бостириб кириб, ўт очганди. Оқибатда икки киши ўлган, саккиз киши яраланганди.