Эронда 3 нафар намойиш иштирокчиси қатл этилди

Эронда жорий йил январь ойидаги намойишларнинг уч иштирокчиси ҳуқуқ-тартибот идораларининг икки ходимини ўлдирганлик учун қатл этилди. Бу ҳақда “Tasnim” хабар берди. 

“Эрондаги январь тартибсизликларида қатнашган уч нафар маҳкум ҳуқуқ-тартибот идораларининг икки ходимини ўлдиргани учун осиб ўлдирилди”, дейилади хабарда.

Қайд этилишича, айбланувчилар Эронда январь ойида бўлиб ўтган ҳукуматга қарши намойишлар вақтида ҳуқуқ-тартибот идоралари ходимларини ўлдирганликларини тан олган. Бундан ташқари, улар АҚШ ва Исроил манфаатлари йўлида фаолият юритганликда айбланган.

Эслатиб ўтамиз, Эрондаги намойишлар 2025 йил декабрь охирида миллий валютанинг қадрсизланиши (девальвация) сабабли бошланган, бироқ кейинчалик тартибсизликларга ва ҳукуматга қарши акцияларга айланиб кетган эди.

Шунингдек, мамлакатда интернет ишламай қолган, ҳам хавфсизлик кучлари, ҳам ғалаён иштирокчилари орасида қурбонлар борлиги хабар қилинганди. Тартибсизликларни ташкил этишда АҚШ ва Исроилни айблаган Эрон ҳукумати 12 январда вазият назоратга олинганини эълон қилган эди.