Эрон урушни Трампнинг президентлик муддати тугагунча чўзмоқчи

Эрон АҚШ билан давом этаётган урушни Дональд Трампнинг президентлик муддати якунлангунга қадар чўзиш вариантини кўриб чиқмоқда. Бу ҳақда Эрон Ислом инқилоби қўриқчилари корпуси бош қўмондони маслаҳатчиси, бригада генерали Муҳаммад Ризо Нақдий PBS телеканалига берган интервьюсида маълум қилди.

Нақдийнинг айтишича, Теҳроннинг асосий мақсади Эронга қарши янги ҳужумларнинг олдини оладиган даражадаги тийиб туриш механизмини яратишдан иборат.

“Қаранг, биз душман ҳеч қачон бизга ҳужум қилишга журъат эта олмайдиган даражадаги тийиб туриш омилига эришишимиз керак. Бунинг йўлларидан бири – бу урушни кейинги президентлик муддатигача чўзиш ва шундай зарар етказишки, агар яна кимдир Эронга ҳужум қилишни истаса, бунинг учун катта бадал тўлашига тўғри келишини билсин”, деган у.

Генералга Эроннинг савдо кемаларига ҳужумлари халқаро денгиз ҳуқуқини бузиши мумкинлиги ҳақида савол берилганда, у уруш шароитида хавф туғдирувчи транспорт йўлларини назорат қилиш қонуний эканини таъкидлаган.

“Уруш шароитида биз таҳдид солувчи ҳар қандай транспорт артериясини назорат қилишимиз мумкин. Халқаро ҳуқуқ айнан шуни назарда тутади. Дунёнинг қайси нуқтасида уруш бўлса, шу қоида амал қилади”, деган Нақдий.

Маълумот учун, Дональд Трампнинг иккинчи президентлик муддати 2025 йил январда бошланган бўлиб, 2029 йил 20 январда якунланади. АҚШ Конституциясининг 22-тузатишига кўра, бир шахс икки мартадан ортиқ президент лавозимини эгаллай олмайди.

АҚШ ва Эрон ўртасидаги уруш 2026 йил февраль ойининг охирида бошланган. Орадан 20 кун ўтиб, Эрон Ташқи ишлар вазири Аббос Ароқчининг айтишича, Вашингтон музокараларни ўзи таклиф қилган. Жорий йилнинг 18 июнь куни томонлар ўзаро англашув меморандумини имзолаган, бироқ кейинчалик ҳарбий ҳаракатлар яна қайта бошланган.

Теҳрон АҚШни меморандум шартларига риоя қилмасликда айблаган. Ароқчининг таъкидлашича, мазкур ҳужжат шартлари бажарилиши музокараларни тиклашнинг асосий шартларидан бири ҳисобланади. Ҳозирча томонлар тўғридан тўғри музокара олиб бормаяпти ва фақат воситачилар орқали мулоқот қилмоқда.

Эслатиб ўтамиз, аввалроқ АҚШ Президенти Дональд Трамп Ҳормуз бўғози миналардан тўлиқ тозаланганини ва бўғоз 100 фоиз АҚШ ҳарбий-денгиз кучлари назоратида эканини маълум қилган эди.