Эрон Трамп даврида АҚШ билан мулоқотга тайёр – вице-президент

Эрон ҳукумати АҚШнинг сайланган президенти Дональд Трамп маъмурияти билан мулоқот ўрнатишга тайёр. Бу ҳақда Ислом Республикасининг стратегик масалалар бўйича вице-президенти Муҳаммад Жавад Зариф "Foreign Affairs" журналида ёзди.

"Ғарб давлатлари Эронга босим ўтказиш ўрнига ижобий қадамлар ташлаши керак. Ядровий келишув бундай чора-тадбирларнинг ўзига хос намунаси эди ва Ғарб уни қайта тиклашга интилиши керак. Унинг тикланишига эришиш учун у аниқ амалий чора-тадбирларга, жумладан, сиёсий, ҳуқуқий ва сармоявий қарорларга ўтиши керак, улардан Эрон фойда кўриши мумкин. Трамп шундай қадамлар ташлашга қарор қилса, Эрон ҳам Теҳронга, ҳам Вашингтонга фойда келтирадиган мулоқотга тайёр бўлади", деб ёзди Зариф.

Эрон расмийсига кўра, "20 йилдан ортиқ давом этган иқтисодий санкциялардан сўнг, АҚШ ва унинг Ғарбдаги иттифоқчилари Эрон уларнинг босимига берилмаганини тан олишлари керак; мажбурлаш чоралари доимий равишда тескари натижа берган".

Зарифнинг эслатишича, АҚШнинг Эронга максимал босим сиёсатига жавобан Ислом Республикаси уранни бойитиш суръатини ошириб, Атом энергияси бўйича халқаро агентлик инспекторларининг ядровий иншоотларига киришини қисқартирган.

Зарифнинг таъкидлашича, Эрон Президенти Масъуд Пезешкиён “Яқин Шарқда барқарорлик ва иқтисодий ривожланиш, қўшни араб давлатлари билан ҳамкорлик қилиш ва Эрон иттифоқчилари билан муносабатларни мустаҳкамлашга интилади, бироқ айни пайтда Ғарб билан конструктив ҳамкорликни хоҳлайди”.

"Пезешкиён ҳукумати АҚШ билан зиддиятларни бартараф этишга тайёр ва ядровий келишув бўйича тенг ҳуқуқли музокаралар олиб боришга умид қилмоқда”, дея қўшимча қилди сиёсатчи.

Эронда Зариф Теҳроннинг Вашингтон билан мулоқотининг асосий тарафдори саналади. Эрон консерваторлари уни доимий равишда ғарбпараст позицияси учун танқид қилади ва бу амалдор Ислом Республикаси қонунларини бузган ва фарзандлари Америка фуқаролигига эга бўлган пайтда вице-президент лавозимини эгаллаган, деб ҳисоблайди.

2013 йилдан 2021 йилгача Зариф Эрон ташқи ишлар вазири бўлган ва 2015 йилги ядровий келишувни ишлаб чиқиш ва тузишда бевосита иштирок этган.

Трамп 5 ноябрь куни бўлиб ўтган АҚШ президентлик сайловларида ғалаба қозонди. Давлат раҳбари сифатидаги биринчи муддатда у Эронга максимал босим сиёсатини эълон қилди, Теҳронга нисбатан қаттиқ санкциялар қўйди, 2018 йилда ядровий келишувдан чиқди ва Исроилга сиёсий-ҳарбий ва иқтисодий ёрдамни оширди.

"Эрон расмийлари Американинг сайланган раҳбарига исломий республикага максимал босимдан воз кечишни маслаҳат бермоқда. Агар у қарама-қарши қарор қабул қилса, Қўшма Штатлар Теҳроннинг "максимал қаршилигига" дуч келади", деди Эрон Ташқи ишлар вазири Аббос Ароқчи.