Эрон Канн фестивалида “рухсатсиз” қатнашган режиссёрни қамади

Эрон суди таниқли кинорежиссёр Саид Рустаини “Лейланинг оғалари” фильмини 2022 йилда Канн кинофестивалида намойиш этгани учун олти ойлик қамоқ жазосига ҳукм қилди. Бу ҳақда “The Guardian ” нашри хабар берди.

Гап шундаки, ушбу фильм Теҳрондаги иқтисодий қийинчиликлар билан курашаётган оиланинг мураккаб ҳаёти ҳақида ҳикоя қилади. Шу сабабли, фильм экран юзини кўрганидан бери Эронда тақиқланган. “Лейланинг оғалари” ўтган йили Канн фестивалида “Олтин пальма япроғи” учун даъвогар бўлган. Шунингдек, Халқаро кинотанқидчилар федерацияси мукофотини қўлга киритган эди. 

Маҳаллий ОАВ вакилларига кўра, шу ҳафта бошида Рустаи ва фильм продюсери Жавад Норузбеги фестивалда фильмни намойиш қилгани учун олти ойга қамоқ жазосига ҳукм қилинди.  Расмийларнинг билдиришича, “Лейланинг оғалари” фильми “халқаро кинофестивалларда рухсатсиз қатнашиб, қоидаларни бузган. Режиссёр эса маданият вазирлиги талабига биноан фильмни “тузатиш”дан бош тортган. Шундан сўнг, ижодкорлар “мухолифатнинг исломий тузумга қарши тарғиботига ҳисса қўшганликда” айбдор, деб топилди. 

Маълумот учун, 34 ёшли Рустаи 2019 йилда Эроннинг гиёҳванд моддалар муаммосига муросасиз қараши ҳамда полициянинг бу масалага шафқатсиз ва самарасиз жавобини акс эттирувчи “Теҳрон қонуни” фильмидан сўнг халқаро миқёсда шуҳрат қозонган.

Эслатиб ўтамиз, аввалроқ Эронлик рэпер Тумаж Солиҳий ўтган йили мамлакатда авж олган намойишларда қатнашгани учун қамоқ жазосига ҳукм қилинганди.