Эрон Иорданиядаги АҚШ ҳарбий базасига зарба берди (видео)

Эрон Ислом инқилоби қўриқчилари корпуси (ИИҚК) бугун, 14 июль куни Иорданиядаги АҚШ ҳарбий-ҳаво базаси Эроннинг баллистик ракеталари билан нишонга олинганини маълум қилди ҳамда Иордания аҳолисини мамлакатдаги Америка ҳарбий базаларини тугатишга чақирди. ИИҚК бу ҳақдаги баёнотини “Fars News” агентлигида эълон қилди.

“Биз сизларнинг мамлакатингизга нисбатан ҳеч қандай адоватимиз йўқлигини яхши биласиз. Аксинча, Фаластин халқи дарди ва зулмини бошқа ҳар қандай миллатдан яхшироқ тушунадиган олижаноб халқ сифатида сизларни яхши кўрамиз”, дейилади баёнотда.

Иордания Қуролли кучлари эса мамлакат ҳаво ҳудудига Эрон томонидан учирилган тўртта ракета киргани ва улар йўқ қилинганини маълум қилган.

Шу куни АҚШ Марказий қўмондонлиги Президент Дональд Трамп кўрсатмасига биноан бошланган Эронга қарши навбатдаги зарбалар тўлқини якунланганини билдирган. Беш соат давом этган мазкур ҳужумлар Трамп Эрон кемаларига қарши денгиз блокадасини қайта жорий қилгани ҳамда Ҳормуз бўғози орқали ўтаётган барча юклар учун 20 фоизлик тўлов жорий этиш таклифини илгари сурганидан кейин Эронга қарши учинчи кетма-кет тунги ҳужум бўлди.

Эрон Қуролли кучлари бирлашган қўмондонлиги АҚШнинг мазкур сув йўлининг келажагини белгилашга ҳеч қандай ҳаққи йўқлигини билдирган.

Эрон Ташқи ишлар вазири Аббос Ароқчи X ижтимоий тармоғида Теҳрон Ҳормуз бўғозининг ҳақиқий қўриқчиси бўлиб қолишини таъкидлаб, “20 фоиз, албатта, жуда кўп. Биз адолатли бўламиз”, деб ёзган.

Эслатиб ўтамиз, аввалроқ АҚШ Президенти Дональд Трамп Конгрессни Эронда ҳарбий амалиётлар қайта бошланганидан расман хабардор қилган эди.