Эрон Ҳормуз бўғозини очиш учун АҚШга талаб қўйди

Эрон Ҳормуз бўғозини қайта очиш учун АҚШга бир қатор талабларни қўйиб, Вашингтон ўз хатти-ҳаракатларини ўзгартирмагунча стратегик сув йўли очилмаслигини билдирди. Бу ҳақда “The Guardian” хабар берди.

Қайд этилишича, Эрон Олий миллий хавфсизлик кенгаши АҚШ бундан буён Эронга таҳдид қилмаслиги, Эрон ва минтақадаги иттифоқчи қуролли гуруҳларга қарши урушни тўлиқ тўхтатиши кераклигини билдирган.

Шунингдек, Вашингтондан Эрон портларига ўрнатилган денгиз блокадасини бекор қилиш, ҳарбий кучларини ҳудуддан олиб чиқиш, уруш оқибатида етказилган зарарни тўлиқ қоплаш, Эронга қарши санкцияларни бекор қилиш ҳамда музлатилган активларни ҳеч қандай шартсиз озод қилиш талаб қилинган.

Эрон Ташқи ишлар вазири Аббос Ароқчи навигация, хусусан, транзит йўналишини белгилаш масаласида келишувга эришишга яқин эканликларини айтган. Бироқ унинг таъкидлашича, бўғознинг очилиши бошқа шартларнинг бажарилишига боғлиқ.

Музокараларда воситачилик қилаётган Уммон томонлар ўртасидаги музокаралар “ижобий ва конструктив муҳитда” давом этаётганини маълум қилган.

Шу билан бирга, Эрон Ҳормуз бўғозидан ўтувчи кемалардан тўлов ундиришни истамоқда. АҚШ эса бундай тўловларга қарши чиқмоқда.

Якуний келишув бўйича музокаралар учун белгиланган 60 кунлик муддат бир ҳафтадан сал кўпроқ вақт ичида тугаши кутилмоқда. Бироқ томонлар бу муддатни узайтириши мумкин.

Эрон Президенти Масъуд Пезешкиён эса ҳозир келишувга эришиш учун энг яхши вақт эканини айтган. Унинг сўзларига кўра, мамлакатда ҳамжиҳатлик, куч ва бирлик мавжуд.

Маълумот учун, Ҳормуз бўғози жаҳон нефть ва табиий газ таъминоти учун муҳим стратегик сув йўли ҳисобланади. Ҳозирда у орқали кемалар қатнови кескин камайган.

Эслатиб ўтамиз, аввалроқ Оқ уй раҳбари Дональд Трамп Яқин Шарқ мамлакатларининг илтимосига биноан Эронга бериладиган зарбаларни вақтинча тўхтатишга буйруқ берганини маълум қилган эди.