Эриксен Украинага қарши ўртоқлик учрашувида ҳушидан кетди

Кеча, 7 июнь Дания терма жамоаси ярим ҳимоячиси Кристиан Эриксен Украинага қарши ўртоқлик учрашуви вақтида ҳушидан кетди.

Оденсе шаҳрида бўлиб ўтган баҳс иккинчи бўлим ўрталарида, ҳисоб данияликлар фойдасига 2:1 кўринишида бўлиб турган пайтда тўхтатилди. Эриксен майдонда ўзини ёмон ҳис қилиб, ерга йиқилгандан сўнг, ўйин давом эттирилмади.

Эслатиб ўтамиз, 2021 йилда Дания ва Финляндия ўртасидаги Европа чемпионати учрашувида Эриксеннинг юраги тўхтаб қолган эди. Шифокорлар унга бир неча дақиқа давомида биринчи тиббий ёрдам кўрсатган, жумладан, юрагини ташқи массаж қилган. Кейинчалик даниялик футболчига кардиовертер-дефибриллятор ўрнатиш бўйича операция қилинган. Шу сабабли ўша пайтда “Интер” сафида тўп сурган Эриксен Италия чемпионатида иштирок эта олмаган эди.

34 ёшли Кристиан Эриксен айни пайтда Германиянинг “Вольфсбург” клубида тўп сурмоқда. У фаолияти давомида “Аякс”, “Тоттенхэм”, “Интер”, “Манчестер Юнайтед” ва “Брентфорд” клублари шарафини ҳам ҳимоя қилган.

Маълумот учун, Эриксен уч марта Нидерландия чемпиони ва бир марта Италия чемпиони бўлган. Шунингдек, у “Тоттенхэм” билан Чемпионлар лигаси финалига чиққан.

Дания терма жамоаси тарихидаги энг яхши тўпурарлардан бири саналадиган Эриксен 151 та учрашувда майдонга тушиб, 46 та гол урган. Унинг иштирокида Дания терма жамоаси Евро-2020 (2021 йилда ўтказилган) мусобақасида ярим финалгача етиб борган.