Эрдўған сайловда мағлуб бўладими? Сайловолди сўровнома ўтказилди

Туркияда президент ва парламент сайловлари олдидан ўтказилган сўровлар натижасига кўра, мухолифатдан президентликка номзод қилиб кўрсатилган Камол Қиличдорўғли амалдаги Президент Ражаб Тойиб Эрдўғандан 10 фоизга устунликка эришган. Бу ҳақда “Haberler” нашри хабар берди. 

Қайд этилишича, сўнгги воқеалар сабаб Эрдўғаннинг обрўси тушгани ортидан бу сафарги сайловлар унинг 20 йиллик бошқаруви учун энг катта муаммо бўлади. Сайлов нафақат Туркияни ким бошқаришини, балки унинг қандай бошқарилиши, иқтисодиёти қаерга қараб кетиши, Украина ва Яқин Шарқдаги можароларни юмшатишда қандай роль ўйнашини ҳал қилади.

“Туркиядаги барча нотўғри ишларда Эрдўғанни айблаш билан бу муаммолар ечилиб қолмайди. Ўтган сайловлар Эрдўғаннинг ажойиб тарғиботчи эканлигини кўрсатди, аммо сўнгги гап-сўзлар унинг сайловчилар билан алоқа қилиш қобилиятини йўқотганини кўрсатмоқда”, дейди сиёсий хавфлар бўйича маслаҳатчи Вольфганг Пикколи. 

Aksoy Research томонидан ўтказилган сўровлар натижасига кўра, аҳолининг 55,6 фоизи Қиличдорўғлини, 44,4 фоизи эса Эрдўғанни қўллаб-қувватлаган. Мос равишда, Қиличдорўғлининг “Жумҳурият Халқ” партияси 31,8% билан олдинга чиққан бўлса, Эрдўғаннинг “Адолат ва тараққиёт” партияси 31% овоз билан ундан ортда қолди.

Эслатиб ўтамиз, Эрдўған аввалроқ таътил мавсуми, мактаб имтиҳонлари ва Қурбон ҳайити муносабати билан овоз беришни қонуний белгиланган сана – 18 июндан 14 майга кўчириш ниятида эканини билдирган эди. Боиси бундан 73 йил аввал, 1950 йилнинг 14 май куни Туркияда илк бор кўп партиявийликка қадам ташланган. Шу йили Аднан Мендерес ва Жалол Баяр бошчилигидаги Демократлар Отатурк таъсис қилган ва 27 йил иқтидорда бўлган “Жумҳурият халқ” партияси устидан ғалабага эришиб, мамлакат бошқарувини қўлга олган. Жорий йилнинг 10 мартида эса Эрдўған сайловларни 14 май куни ўтказиш тўғрисидаги қарорни имзолаганди.