Эрдўған космосдаги илк турк фазогири билан видеомулоқот қилди (видео)

Туркия Президенти Ражаб Тойиб Эрдўған космосдаги илк турк космонавти Алпер Гезеравжи билан видеомулоқот қилди. Бу ҳақда “Анадолу” агентлиги хабар берди.

Шунингдек, Эрдўған Гезеравжига муваффақиятлар тилади ва у коинотда бўлганидан фахрланишини билдирди.

“Сиз бу лавозимга энг яхши номзод бўлдингиз. Ишончим комилки, сиз бунинг учун қийин ва машаққатли синовларни енгиб ўтасиз. Ушбу мураккаб вазифа орқали халқимиз, жумладан, келажак авлодлар учун илҳом манбаи бўласиз. Сиз бизнинг биринчи космонавтимиз бўлдингиз, лекин охирги бўлмайсиз”, деган Эрдўған.

Ўз ўрнида, Алпер Гезеравжи Эрдўған билан учрашиб, унга фазодан қайтадиган Туркия байроғини топширишни сабрсизлик билан кутаётганини айтган.

Суҳбат давомида, “у ерда бўлиш қандай туйғу бағишлайди?", деб сўраган Туркия Президенти Гезеравжидан.

“Ўзингизни қушдек енгил ҳис қиласиз. Бу жуда бошқача тажриба. Билимларимни юртимизда бошқалар билан бўлишмоқчиман. Мен жуда яхшиман. Турк космонавтика ва илм-фан миссиясида қатнашганимдан хурсандман. Ўзимизга бўлган ишончимизни ошириш ва мустаҳкамлаш имкониятини яратганингиз учун сиздан миннатдорман”, деб жавоб берган космонавт.

Эслатиб ўтамиз, жорий йилнинг 19 январь куни Америкадаги SpaceX хусусий компаниясининг Crew Dragon космик кемасида биринчи марта туркиялик Алпер Гезеравжи сайёҳлар экипажи билан Халқаро космик станцияга учгани ҳақида хабар бергандик. 20 январь куни эса ойни забт этган космонавтларнинг фазодаги машҳур сўзлари нима бўлгани ҳақида ёзгандик.