Energetika vazirligiga bazaviy me’yorlar muddatini o‘zgartirish vakolati berildi

Energetika vazirligiga hukumat bilan kelishgan holda, havo haroratidan kelib chiqib, tabiiy gaz va elektr uchun bazaviy me’yorlarning isitish va boshqa mavsumlardagi amal qilish muddatlariga o‘zgartirish kiritish vakolati berildi. Bu haqda Vazirlar Mahkamasining joriy yil 28 fevral kuni qabul qilingan tegishli qarorida so‘z boradi.

Unga ko‘ra, Energetika vazirligi, “Hududiy elektr tarmoqlari” AJ va “Hududgazta’minot” AJ bazaviy me’yorlarning amal qilish muddatlariga kiritilgan o‘zgartirishlar to‘g‘risida o‘zining rasmiy veb-sayti hamda ommaviy axborot vositalari orqali e’lon qilib borishi lozim.

Eslatib o‘tamiz, avvalroq joriy yil 1 mart sanasidan e’tiboran O‘zbekistonda isitish mavsumida tabiiy gaz uchun joriy qilingan 500 kubometrlik bazaviy me’yor 100 kubometrga tushirilishi belgilangan edi. Biroq mart oyida havo haroratining past bo‘lishi sababli Vazirlar Mahkamasining tegishli qarori bilan isitish mavsumi uchun belgilangan bazaviy me’yor joriy yilning 1 apreligacha uzaytirilgandi.