Энди Бёрнэм Буюк Британиянинг янги Бош вазири бўлади

Энди Бёрнэм Буюк Британия Лейбористлар партиясининг етакчиси этиб расман эълон қилинди. Бу ҳақда “The Guardian” хабар берди.

Маълум қилинишича, Буюк Британияда Катта Манчестер собиқ мэри Энди Бёрнэм парламентдаги лейборист депутатлар, касаба уюшмалари ва партиянинг маҳаллий бўлимлари томонидан катта қўллаб-қувватловга эга бўлиб, Кейр Стармернинг ягона ворисига айланган.

Буюк Британия Бош вазири лавозимига тайёрланаётган Энди Бёрнэм Лейбористлар партияси етакчиси сифатидаги илк нутқида Кир Стармерга миннатдорлик билдирган. Унинг айтишича, партиянинг сўнгги йиллардаги ютуқлари айнан Стармер раҳбарлигидаги ўзгаришлар билан боғлиқ.

“Мен раҳбарлик қилишга ва бугун биз эга бўлган мустаҳкам пойдевор устида ишни давом эттиришга тайёрман. Бу пойдеворни барчадан кўра кўпроқ бир инсон – Кир Стармер яратди. Кир Стармер раҳбарлигида биз тарихимиздаги энг оғир мағлубиятдан энг йирик ғалабалардан бирига эришдик. Кир Лейбористлар партиясини одамлар ҳаётини ўзгартира оладиган даражага қайтарди ва биз сўнгги икки йил давомида айнан шу иш билан шуғулландик.

Кутилганидек, Кир Стармер 20 июль куни – келгуси иш ҳафтасининг бошланишида эрталаб Букингем саройида қирол Чарльз III билан учрашиб, Бош вазирлик ваколатларини Энди Бёрнэмга топширади.

Шундан сўнг, Бёрнэм Даунинг-стрит олдида нутқ сўзлайди ва куннинг иккинчи ярмида янги ҳукумат таркибини эълон қилади. Манбанинг қайд этишича, янги раҳбар келаси ҳафталарда аҳолининг яшаш харажатларини камайтиришга қаратилган қатор янги сиёсий ташаббусларни тақдим этиши кутилмоқда.

Эслатиб ўтамиз, 22 июнь куни Буюк Британия Бош вазири Кир Стармер истеъфога чиқишини эълон қилган эди.