Эмболонинг Аргентинага қарши ўйинда ноҳақ четлатилганлиги айтилди

Футбол қоидаларини белгилаш учун масъул бўлган Халқаро футбол ассоциациялари кенгаши (IFAB) 2026 йилги Жаҳон чемпионатида Швейцария терма жамоаси ҳужумчиси Брель Эмболонинг Аргентинага қарши учрашувда ноўрин равишда майдондан четлатилганини тасдиқлади. Бу ҳақда ESPN хабар берди.

IFAB Жаҳон чемпионати давомида VAR тизимидан фойдаланиш билан боғлиқ ҳолатлар юзасидан махсус баёнот эълон қилди. Унда таъкидланишича, Эмболога кўрсатилган қизил карточка ўйин қоидаларига мос келмаган ва ҳакамлар томонидан хатога йўл қўйилган.

Ташкилот мазкур қарор VAR тизимини қўллашдаги хатонинг натижаси эканини қайд этди ҳамда бундай вазиятларнинг келажакда такрорланмаслиги учун тегишли тавсиялар ишлаб чиқилишини маълум қилди.

Маълумот учун, Жаҳон чемпионатининг 1/4 финал босқичида Аргентина Швейцарияни 3:1 ҳисобида мағлубиятга учратганди. Ўйиннинг 70-дақиқасида учрашув бош ҳаками Жоао Педро Сильва Пинейро симуляция ишлатгани учун Брель Эмболога иккинчи сариқ карточка бериб майдондан четлатганди. Ўша пайтда ўйинда 1:1 ҳисобидаги дуранг кузатилаётганди.