Эбола билан касалланганлар сони мингдан ошди

Конго Демократик Республикасининг шарқида давом этаётган Эбола эпидемиясида тасдиқланган касалланиш ҳолатлари сони 1 003 нафарга етди. Улардан 254 нафари вафот этган. Бу ҳақда “Associated Press” хабар берди.

Конго Соғлиқни сақлаш вазирлигининг хабарига кўра, жорий йилнинг 15 май куни эълон қилинган эпидемия бошланганидан буён 100 нафар бемор соғайган. Ҳозирда камида 365 киши шифохоналарда даволанмоқда ёки изоляцияда сақланмоқда.

Расмийларнинг айтишича, аниқланмаган ҳолатлар сони бундан ҳам кўп бўлиши мумкин ва эпидемиянинг энг юқори чўққиси ҳали олдинда. Соғлиқни сақлаш вазирлигининг маълумотларига кўра, касалланганлар билан алоқада бўлганларни аниқлаш ишлари асосий муаммолардан бири бўлиб қолмоқда. Ҳозирча кузатув даражаси атиги 55 фоизни ташкил этган.

Қайд этилишича, касалликни Бундибугё вируси келтириб чиқарган бўлиб, унга қарши ҳозирча тасдиқланган вакцина ёки даволаш усули мавжуд эмас. Бир ойдан ортиқ вақт ўтганига қарамай, мутахассислар касаллик тарқалиши унга қарши кураш чораларидан тезроқ кечаётганини ва эпидемиянинг ҳақиқий кўлами ҳали номаълумлигини таъкидламоқда.

Африка Касалликларни назорат қилиш ва олдини олиш маркази бош директори доктор Жан Касеянинг айтишича, Эбола эпидемиясини назорат қилиш учун аввало биринчи беморни аниқлаш зарур.

“Агар сиз эпидемияни, айниқса Эбола эпидемиясини назорат қилмоқчи бўлсангиз, касалликнинг илк манбасини билишингиз керак. Биз бу эпидемия қачон бошланганига ишонч билан жавоб бера олмаяпмиз”, деган у.

Эслатиб ўтамиз, аввалроқ япон олимлари томонидан ўтказилган математик моделлаштириш натижаларига кўра, Африкада Эбола вирусини юқтирган шахслар 30 кун ичида юқори эҳтимол билан Европа ва Осиёнинг йирик транзит аэропортларига етиб бориши мумкинлиги ҳақида хабар берилган эди.