Дунёнинг энг бой шаҳарлари рейтинги эълон қилинди. Рўйхатда Ўзбекистоннинг бирор шаҳри борми?

Henley & Partners инвестиция ва миграция фирмаси дунёнинг энг бой шаҳарлари рейтингини маълум қилди. 

Қайд этилишича, Нью-Йорк бу гал ҳам дунёнинг энг бой шаҳри дея эътироф этилган. Унга кўра, шаҳарда 340 мингга яқин миллионерлар истиқомат қилади. Умуман олганда, рейтингдаги 50 шаҳардан 10 таси ёки бешдан бир қисми АҚШда жойлашган. Япония пойтахти Токио, Калифорниянинг Бей Эреа, Буюк Британия пойтахти Лондон ҳамда Сингапур шаҳарлари мос равишда рўйхатнинг кейинги поғоналаридан ўрин эгаллаган. Ҳар йили ўтказиладиган сўров бўйича дунёнинг 9 минтақасида жойлашган 97 та шаҳар кўриб чиқилган. 

Нью-Йоркда яшовчи миллионерлар сони 2012-2022 йиллар давомида 40 фоизга ўсган. Бу вақтда Сингапур ҳам худди шундай кўрсаткичга эришган. 

Элликталик рўйхатдан ўрин олган шаҳарлари сони бўйича АҚШдан кейинги ўринни Хитой, учинчи поғонани эса 4 та шаҳар билан Австралия эгаллаган. 

Юқори даромадли шахслар сонининг ўсиши бўйича Хитойнинг Ханчжоу шаҳри етакчилик қилмоқда. Шаҳарда бундай шахслар сони ўн йил ичида 105 фоизга ўсган. АҚШнинг Техас штати Остин шаҳри эса 102 фоиз билан иккинчи поғонада. Пандемия даврида юқори даражадаги бизнес раҳбарлари ва молиявий фирмаларнинг кўчиб ўтиши туфайли Флорида штатининг Маями ва Уэст-Палм-Бич шаҳарларида яшовчи бойлар сони мос равишда 75 ва 90 фоизга ўсган. 

Россиянинг энг катта шаҳарлари Москва ва Санкт Петербургда эса катта даромадли кишилар сони Украинага қилинган уруш ортидан қўлланилган санкциялар оқибатида мос равишда 44 ва 38 фоизга пасайган. 

Таъкидлаш жоизки, Африка қитъасида жойлашган Намибия, Замбия, Кения, Мозамбик, Руанда, Эфиопия, Танзания, Ангола, Гана каби давлатларнинг ҳеч бўлмаганда биттадан шаҳри топ-тўқсон еттиталикда бор бўлгани ҳолда Марказий Осиё, хусусан, Ўзбекистоннинг бирорта шаҳри рўйхатдан ўрин олмаган.