Тошкентда Туркия элчиси жаҳон сиёсатидаги иккиюзламачиликларни қоралаб чиқди (видео)

Бугун, 28 март куни Тошкентдаги “Hilton” меҳмонхонасида бўлиб ўтган “Дунё адолатлироқ бўлиши мумкин” номли жамоат форумида  Туркиянинг Ўзбекистондаги Фавқулодда ва мухтор элчиси Уфук Улуташ БМТ Хавфсизлик Кенгашининг 5 нафар доимий аъзоси Хитой, Франция, Россия, Буюк Британия ва АҚШнинг вето ўйинлари ҳақида сўз очиб, жаҳонда юз бераётган адолатсиз ва иккиюзламачилик сиёсатига тўхталди. Бу ҳақда QALAMPIR.UZ мухбири хабар берди.

20 дан ортиқ турли мамлакатлар қатори Ўзбекистонда ҳам глобал миқёсда содир бўлаётган адолатсизликларнинг сабабларини ўрганиш ва бу адолатсизликларга ечим топиш мақсадида ўтказилган учрашувда элчи нутқини Туркия Президенти Ражаб Тоиб Эрдўғаннинг бир неча йил олдин айтган “Дунё беш мамлакатдан катта” деган сўзи билан бошлади.

Уфук Улуташга кўра, Эрдўғаннинг бу чақириғи Сомалидан Индонезиягача, Босния-Герсеговинадан Судангача, Ўзбекистондан Венесуэлагача, Фаластиндан Руандагача дунёнинг ҳар бир бурчагида акс-садо берган. 

Элчи гапини Иккинчи жаҳон урушидан кейин Бирлашган Миллатлар Ташкилоти марказида адолат ва тинчлик ўрнатиш мақсадида тузилган халқаро тизим (Хавфсизлик Кенгаши таҳр.) йиллар давомида эскираётгани, бу ўқда ўрнатилган қоидалар икки томонлама стандартлар билан қўлланилаётгани ҳақидаги хавотирлари билан давом эттирди.

Дипломат бунга мисол сифатида Фаластин масаласини кўрсатиб, йиллар давомида Фаластин халқига қилинаётган жиноятлар қаршисида халқаро ҳамжамият нақадар ожиз қолганини танқид остига олди.

• “Ҳаммаси ҳам майли, 2023 йил 7 октябрдан буён биз гувоҳ бўлган шафқатсизлик, ваҳшийлик ва қирғинлар;
• ҳаётдан юлиб олинган болалар ва аёллар;
• ўз хизмат вазифаларини бажариш чоғида ҳалок бўлган журналистлар, халқаро ташкилотлар вакиллари ва тиббиёт ходимлари;
• очлик ва маҳрумлик билан жазоланган ўн минглаб одамлар;
• шифохоналари ва мактаблари вайрон бўлган бегуноҳ одамлар;
• ўз ватанларидан қувғун қилинган минглаб муҳожирлар бу тенденцияга нуқта қўйиш кераклигининг сўнгги мисолидир”, деди элчи.

Элчи мусулмонларга нисбатан уюштирилган қатлиомлардан яна бири – Болқонда мутаассиблар ва геноцид тарафдорлари қўлида қолган аҳолининг ночорлиги ҳақидаги аччиқ хотираларни ёдга олди.

Шунингдек, Улуташ Суриядаги собиқ президент Башар Асад режимининг хунрезликларига ҳам тўхталиб ўтди.

“Суриядаги ҳукумат ўз халқига турли йўллар билан, жумладан кимёвий қуроллар билан зарар етказганда сукут сақлаган ҳолда Сурия халқининг не чоғлик ёлғиз қолганини биргаликда бошимиздан ўтказдик”, деди у.

Элчи сўзининг сўнггини Бирлашган Миллатлар Ташкилоти фаолиятига тўхталиб, ташкилот томонидан қабул қилинган қарорлар ва берилган ваъдалар тўғри бажарилмаётганини айтди ва БМТ чуқур ислоҳотга муҳтож эканини баён қилди.

Эслатиб ўтамиз, ўтган ойда Туркиянинг Ўзбекистондаги 4 йиллик элчиси  Олган Бекар миссиясини якунлаганидан сўнг, унинг ўрнига Туркиянинг Ўзбекистондаги Фавқулодда ва мухтор элчиси этиб Уфук Улуташ тайинлаган эди. 6 март куни Ўзбекистон Республикаси Президенти Шавкат Мирзиёев Уфук Улуташнинг ишонч ёрлиқларини қабул қилиб олди.