Доминиканда курорт ҳудуди ёниб кулга айланди (видео)

Доминикан Республикасида кеча, 19 июнь куни содир бўлган ёнғин оқибатида “Viva Dominicus Beach by Wyndham” курорти тўлиқ ёниб кетди ва тахминан 1700 нафар сайёҳ эвакуация қилинди. Бу ҳақда “Associated Press” хабар берди.

Маҳаллий ҳокимият вакилларининг билдиришича, ёнғин мамлакатнинг Кариб денгизи соҳилида жойлашган шарқий туристик шаҳарчадаги меҳмонхонада содир бўлган.

Маълум қилинишича, ёнғин оқибатида бир италиялик сайёҳ ҳалок бўлган, яна бир нечта туристлар тиббий ёрдамга муҳтож бўлган.

“Viva Dominicus Beach by Wyndham” курорти Байяҳибе ҳудудида жойлашган бўлиб, у АҚШ ва бошқа давлатлардан келадиган сайёҳлар орасида машҳур дам олиш маскани ҳисобланади.

Расмийлар маълумотига кўра, тахминан 1690 нафар меҳмон ёнғин сабабли бошқа меҳмонхоналар ва яқин ҳудудлардаги жойларга эвакуация қилинган.

Фавқулодда вазиятлар маркази ёнғин жуда тез тарқалганини, бунга шамол ва курорт томининг қамиш (сомон) материалдан қилинган қисми сабаб бўлганини маълум қилган.

Эслатиб ўтамиз, 3 июнь куни эрталаб Ҳиндистон пойтахти Нью-Деҳлининг жанубида жойлашган меҳмонхонада ёнғин содир бўлганди. Ёнғин оқибатида камида 13 нафар хорижлик фуқаро ҳалок бўлди. Улар орасида 1 нафар Ўзбекистон фуқароси ҳам бор.