Доғистондаги қишлоқ Нурмуҳаммедовнинг отаси шарафига номланиши мумкин 

Доғистондаги қишлоққа марҳум спортчи Абдулманноп Нурмуҳаммедов номи берилиши мумкин. Маҳаллий депутатлар кенгаши мазкур ўзгариш юзасидан овоз берди.

Унга кўра, депутатлар собиқ UFC чемпиони Ҳабиб Нурмуҳаммедов туғилган “Қироваул” қишлоғига спортчининг отаси марҳум Абдулманноп Нурмуҳаммедов номидан келиб чиқиб, “Манапқала” деб ном беришни таклиф қилган. Энди якуний қарор федерал ҳукумат даражасида қабул қилинади.

Бу таклиф дастлаб 2020 йилда Ҳабибнинг отаси вафотидан кейин қишлоқ раиси Муҳаммадрасул Довудов томонидан берилган.

“Абдулманнопнинг бу қишлоққа жуда кўп ёрдами теккан, унинг ўрни бошқача эди. Шунинг учун биз унинг номини абадийлаштириш мақсадида “Қироваул” номини “Манапқала”га ўзгартиришимиз керак. Биз қишлоқ аҳолиси билан маслаҳатлашамиз”, дейди қишлоқ раиси.

Маълумот учун, Абдулманноп Нурмуҳаммедов 2020 йилнинг 3 июль  куни коронавирус касаллигидан 57 ёшида вафот этган. Унга қадар у жанговар самбо бўйича Доғистон Республикаси терма жамоасининг катта мураббийи сифатида ишлаб келган.

Шунингдек, спорт мураббийи профессионал фаолияти давомида эркин кураш бўйича СССР спорт устаси ҳамда Россияда хизмат кўрсатган мураббий унвони, дзюдо ва самбо бўйича Украина чемпиони каби ютуқларни қўлга киритган.