ДХХ икки вилоятда қарийб 1 млн долларга ер сотмоқчи бўлганларни ушлади

3-саҳифа

image
0:00
0:00
download

Давлат хавфсизлик хизмати ходимлари Тошкент ва Қашқадарё вилоятларида ноқонуний ер сотиш ҳолатларини аниқлади. Бу ҳақда ДХХ Матбуот хизмати хабар берди.

Маълум қилинишича, хориждан автомашиналар олиб келиб, сотиш билан шуғулланувчи, Тошкент шаҳрида яшовчи 40 ёшли шахс Тошкент вилоятининг Юқоричирчиқ туманида жойлашган фермер хўжалиги раҳбари билан келишиб, ўзганинг ишончига киради. Улар мазкур хўжаликнинг 16,5 гектар суғориладиган ерини унинг номига расмийлаштириб бериш эвазига 600 минг АҚШ доллари талаб қилишади. Шунингдек, улар бу ишга 1987 й.т. шахсни ҳам жалб қилишади.

ДХХ ва Бош прокуратура ходимлари ҳамкорлигида ўтказилган тезкор тадбир давомида улар сўралган пулни олган вақтларида ашёвий далиллар билан ушланган.

Яна бир ҳолатда, Тошкент шаҳрида яшовчи 1963 ва 1975 йилларда туғилган икки нафар фуқаро тадбиркорлик билан шуғулланмоқчи бўлган шахснинг ишончига кириб, унга “коврак” ўсимлиги етиштириши учун Қашқадарё вилоятининг Деҳқонобод тумани ўрмон хўжалиги ҳудудидан 1000 гектар ер майдони ажратилишида ёрдам беришларини айтиб, эвазига 300 минг АҚШ доллари талаб қилишган.

Давлат хавфсизлик хизматининг Қашқадарё вилояти бўйича бошқармаси ходимларининг вилоят прокуратураси ҳамда иқтисодий жиноятларга қарши курашиш Департаментнинг ҳудудий бошқармаси билан ҳамкорликда Қарши шаҳрида ўтказган тезкор тадбири давомида мазкур шахслар сўралган пулни олган вақтларида ашёвий далиллар билан ушланди.

Терговолди суриштирув ҳаракатлари давомида улар ушбу ноқонуний ишни ўзини гўёки Ўрмон хўжалиги давлат қўмитаси инспектори деб таништирган, 1988 йил Қарши шаҳрида туғилган, ҳозирда Тошкент шаҳрида истиқомат қилиб, аслида хонандалик билан шуғулланувчи, муқаддам судланган шахс билан 80 минг АҚШ доллари эвазига ҳал қилишга ўзаро келишиб олганликлари маълум бўлди ва тезкор тадбир давом эттирилиб, Тошкент шаҳрида дастлабки 24 минг АҚШ долларини олган вақтида у ҳам ушланди.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.


Мақола муаллифи

Теглар

Баҳолаганлар

104

Рейтинг

3

Мақолага баҳо беринг

Дўстларингиз билан улашинг