Депутат Назарбоевнинг хорижга чиқишини чеклашни таклиф қилди

Қозоғистонда Мажлис (парламентининг қуйи палатаси) депутати Ермурат Бапи давлат сирларига эга бўлган собиқ юқори лавозимли амалдорларнинг хорижга чиқишини қонуний жиҳатдан чеклашни таклиф қилди. У бундай шахслар қаторида Қозоғистоннинг биринчи президенти Нурсултон Назарбоевни ҳам тилга олди. Бу ҳақда у жорий йилнинг 28 декабрь куни ўзининг Facebook’даги саҳифасида ёзди.

Ушбу ташаббусга Назарбоевнинг яқинда Кремлда Россия Президенти Владимир Путин билан учрашгани сабаб бўлган. Депутатнинг фикрича, бундай сафарлар миллий хавфсизлик учун муайян хатарлар туғдириши мумкин.

Бапининг айтишича, собиқ президентлар, вазирлар ва бошқа собиқ амалдорлар эга бўлган давлат сирлари мамлакат учун хавфсизлик омили ҳисобланади. Шу боис уларнинг хорижга чиқишини чекловчи ҳуқуқий тўсиқ зарур. Мисол сифатида депутат халқаро амалиётга, жумладан Хитойдаги чекловларга ишора қилган.

“Шу сабабли давлат сирларига эга бўлган шахсларнинг хорижга чиқиш имкониятини тартибга солувчи қонун мамлакат хавфсизлигини таъминлаш учун зарур”, деб ёзган Бапи.

У Назарбоев ва Қайрат Кожамжаров каби шахслар учун олдиндан “чегара назорати” ёки “қизил байроқ” ўрнатишни таклиф қилган. Депутатнинг айтишича, собиқ президентнинг Москвага сафари Қозоғистон давлат органлари ва жамиятига босим сифатида қабул қилиниши мумкин. Кейинроқ журналистлар саволларига жавоб берар экан, Бапи бу ҳолатда мамлакат учун сиёсий фойда кўрмаётганини ҳам билдирган.

“Менга ўз юртида, ўз халқидан таянч топа олмаган инсон ачинарлидир. Энди у мамлакат ташқарисида қўллаб-қувватлаш излашга мажбур. Бу собиқ президент учун фожиа”, дейди депутат.

Эслатиб ўтамиз, аввалроқ Владимир Путин Нурсултон Назарбоев билан учрашув ўтказгани ҳақида хабар берилган эди. Бу Нурсултон Назарбоевнинг 2025 йилда Путин билан бўлиб ўтган иккинчи учрашуви бўлди. Уларнинг аввалги учрашуви жорий йилнинг май ойида бўлиб ўтган эди.