Damas'да 1,5 млрд сўмлик тақинчоқларни олиб кетаётган шахс ушланди

Фарғона вилоятида 1 млрд 440 млн сўмлик заргарлик буюмларининг ноқонуний айланмасига чек қўйилди. Бу ҳақда вилоят Божхона бошқармаси хабар берди.

Қайд этилишича, вилоятнинг Олтиариқ туманида ўтказилган тадбир давомида олдиндан кузатувга олинган “Водил-Олтиариқ” йўналишида ҳаракатланаётган фуқаро бошқарувидаги Damas русумли автотранспорт воситаси ушланиб, белгиланган тартибда кўздан кечирилган.

Натижада автотранспорт воситаси салонининг бар қисмига жойлаштирилган, транспорт воситасида йўловчи сифатида ҳаракатланаётган фуқарога тегишли бўлган жами 3 дона ўрамларда хорижда ишлаб чиқарилган ҳамда божхона расмийлаштирувидан ўтганлигини тасдиқловчи ҳужжатлари бўлмаган заргарлик буюмлари олиб кетилаётганлиги аниқланган. Ўрганишлар давомида дастлабки қиймати 1 млрд 440 млн сўм бўлган оғирлиги 1 кг 332 граммга тенг 5 турдаги 127 дона заргарлик буюмлари экани маълум бўлган.

“Ҳозирда мазкур ҳолат юзасидан терговга қадар текширув ҳаракатлари олиб борилмоқда”, дейилади хабарда.

Эслатиб ўтамиз, аввалроқ Ўзбекистонга 5,7 млрд сўмлик заргарлик буюмларини олиб кирганлар ушланганди.