CNN журналистлари Трамп самолётидан ҳайдалди

Оқ уй CNN телеканали журналистларининг АҚШ Президенти Дональд Трамп билан Air Force One самолётида сафар қилишини тақиқлади. Бу ҳақда “The Guardian” хабар берди.

Қайд этилишича, CNN телеканали 26 сентябрь куни Трамп билан бирга Теннесси штатига коллежлар ўртасидаги американча футбол ўйинини томоша қилиш учун борадиган Air Force One самолётида учиши режалаштирилганини кеча, 25 сентябрь куни маълум қилган.

Бироқ Оқ уйнинг Трампнинг 26 сентябрдаги режалари бўйича журналистларга юборган кўрсатмаларида CNN номи келтирилмаган. Шу орқали маъмурият телеканалнинг Президент самолётидаги сафарини бекор қилганини тасдиқлаган. Бу воқеа Трамп “сохта хабар тарқатувчи ОАВ” деб атайдиган оммавий ахборот воситалари билан маъмурият ўртасидаги зиддият кучайганидан бир ҳафта ўтиб содир бўлган.

CNN, MS Now ва “Politico” журналистлари кеча, 25 сентябрь куни эрталаб Оқ уйга киришга ҳаракат қилган, бироқ уларга туш пайтига қадар бино ичига киришга рухсат берилмаган.

Шундан бир неча соат ўтиб, CNN таҳририяти ва MS Now телеканали журналисти Хитой раҳбари Си Цзиньпиннинг ташрифи муносабати билан ташкил этилган давлат кечасини ёритишдан ҳам четлатилган.

Аввалроқ, Трамп CNN, MS Now ва “Politico” телеканалларининг Оқ уйдаги аккредитацияларини бекор қилган эди. У бунга президентлиги ҳақида салбий хабарлар тарқатилганини сабаб қилиб кўрсатган.

“Оммавий ахборот воситалари доимий равишда ТЎҚИМА ГАПЛАР ва ЁЛҒОНЛАРНИ ёзиши ёки хабар қилиши мумкин эмас”, деб ёзган Трамп ўшанда Truth Social тармоғида. 

У бошқа оммавий ахборот воситаларига нисбатан ҳам шундай чора кўрилишини билдирган.

Оқ уйнинг қарори президентлик матбуот пули журналистларининг кескин норозилигига сабаб бўлган. Улар норозилик сифатида Трамп фаолиятини видеотасвирга олишни вақтинча тўхтатган.