Chirchiqda sobiq texnikum buzilib, o‘rniga Xitoy oliygohining filiali ochiladi

Toshkent viloyatining Chirchiq shahrida joylashgan sobiq texnikum binosi buzilib, uning o‘rniga Xitoyning nufuzli oliy ta’lim muassasasining filiali tashkil etiladi. Bu haqda Chirchiq shahar hokimligi ma’lum qildi.

north_east

O‘zbekiston yerlari chet elliklarga sotib yuborilayaptimi?

Bildirilishicha, Chirchiq shahri Zakovat ko‘chasi 2-uyda joylashgan sobiq texnikum binosi ancha yillardan beri foydalanilmasdan qarovsiz holatga kelib qolgan. Ushbu ob’ekt o‘rnida O‘zbekiston Respublikasi Prezidentining qarorlariga asosan Xitoyning nufuzli oliy ta’lim muassasasining filialini tashkil etish loyihasini amalga oshirish belgilangan.

“Qarorga asosan Xitoy Xalq Respublikasining “Soniya Group Limited” kompaniyasi ta’sischiligida “Chirchiq innovatsiya gimnaziyasi” mas’uliyati cheklangan jamiyati tashkil etilgan. Jamiyat tomonidan “Zamonaviy gimnaziya tashkil etish” loyihasiga 15,0 mln dollar to‘g‘ridan to‘g‘ri xorijiy investitsiyalar jalb qilinishi, 100 tadan ortiq yangi ish o‘rinlari yaratilishi va 500 nafar Chirchiq shahrida istiqomat qiluvchi oilalar farzandlarining sifatli ta’lim olinishi rejalashtirilgan”, deyiladi hokimlik xabarida.

Qayd etilishicha, mazkur sobiq texnikum binosi avariya holatiga kelib qolganligi sababli “Chirchiq Innovatsiya Gimnaziyasi” MCHJning murojaatiga asosan Toshkent viloyati hududiy Qurilish va uy-joy kommunal xo‘jaligi sohasida nazorat qilish inspeksiyasi tomonidan bino-inshootlari vizual ko‘rikdan o‘tkazilib, 2025 yil 16 yanvardagi 01/123-sonli xat orqali binoni buzilishi yuzasidan xulosa berilgan.

Shuningdek, sobiq texnikum binosi O‘zbekiston Respublikasi Vazirlar Mahkamasining 2019 yil 4 oktyabrdagi “Moddiy madaniy merosning ko‘chmas mulk ob’ektlari milliy ro‘yxatini tasdiqlash to‘g‘risida”gi 846-son qaroriga asosan madaniy meros ob’ektlari milliy ro‘yxatga kiritilmagan.