Чилонзорда ўғрилар пайдо бўлгани ростми?

Ижтимоий тармоқларда Тошкент шаҳрининг Чилонзор туманида ўғрилар пайдо бўлгани, улар аҳоли ухлаётган вақтда хонадонлар эшигини очаётгани ҳақида хабарлар тарқалди. Ҳолат юзасидан Бош прокуратура матбуот хизмати муносабат берди.

Аниқланишича, ушбу хабарда кўрсатилган ҳолатлар муқаддам Ички ишлар органлари томонидан мазкур ҳудудлардаги видеокамераларда қайд қилинган ёзувлар, улардаги шахсларни аниқлаган ҳолда ўрганилган.

Ўрганиш натижасига кўра, ижтимоий тармоқда бу борада эълон қилинган хабарлар ўз тасдиғини топмаган.

“Шу боис, ижтимоий тармоқ фойдаланувчиларидан ҳар хил ҳақиқатга тўғри келмайдиган фейк хабарларни тарқатмасликларини сўраб қоламиз. Ҳолат Бош прокуратура томонидан назоратга олинган”, дейилади Бош прокуратура муносабатида.

Эслатиб ўтамиз, Тошкент шаҳрида ўтказилаётган “Долзарб қирқ кунлик” тадбирлари доирасида яна беш киши бир қатор жиноятларни содир этганликда гумонланиб, ушланганди.