Чет элга юборишни ваъда берган фирибгарлар қўлга тушди

Фуқароларни АҚШ, Канада ва Польшага юбориш билан боғлиқ бир нечта фирибгарлик ҳолатлари аниқланди. Бу ҳақда Давлат хавфсизлик хизмати Матбуот хизмати хабар берди.

Дастлабки ҳолат Давлат хавфсизлик хизматининг Самарқанд вилояти бўйича бошқармаси ходимлари томонидан вилоят ИИБ ходимлари билан ҳамкорликда ўтказилган тезкор тадбирда аниқланган. Унда Оқдарё туманида яшовчи 1992 йилда туғилган шахс танишлари орқали Тайлоқ туманида истиқомат қилувчи икки фуқарони “Ўзбекистон – Испания – Мексика – АҚШ” йўналишида Қўшма Штатларга юборишни ваъда берган. Эвазига талаб қилган 44 минг АҚШ долларидан 40 минг АҚШ долларини олган вақтида ашёвий далиллар билан қўлга олинган.

Шунингдек, Тошкент шаҳрининг Олмазор туманида яшовчи 1995 йилда туғилган шахс Ғаллаорол туманида истиқомат қилувчи 1990 йилда туғилган фуқаронинг ишончига кириб, юқори лавозимда ишловчи танишлари орқали уни Канада давлатига ишга юбориш ва виза ҳужжатларини расмийлаштириб беришни ваъда берган. Бунинг эвазига 15 минг АҚШ доллари талаб қилиб, олдиндан 7,5 минг доллар олган вақтида ушланган.

Бундан ташқари, Тошкент шаҳрида фаолият юритувчи МЧЖ раҳбари мансабдор танишлари орқали 3 нафар фуқарони Польша давлатига ишлаш учун юбориш имконияти борлигини маълум қилган. Эвазига 5100 доллар олган вақтида ДХХ Тошкент шаҳар бўйича бошқармаси ҳамда Бош прокуратура ҳузуридаги Департамент ходимлари томонидан қўлга олинган.

Шу жумладан, Сурхондарё вилояти Бойсун туманида яшовчи 1998 йилда туғилган шахс Музработ туманида истиқомат қилувчи 1983 йилда туғилган фуқарога тегишли виза ҳужжатларини расмийлаштириб, Канада давлатига ишга юбориш эвазига 138 млн сўм олган вақтида ушланган. Таъкидлаш лозимки, мазкур шахс муқаддам фирибгарлик жинояти содир этганлиги учун жиноий жавобгарликка тортилган бўлсада, ўз хатосидан тўғри хулоса чиқармаган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.