Chexiya va Janubiy Afrika bahsi durang bilan tugadi

Bugun, 18 iyun kuni 2026 yilgi Jahon chempionatining “A” guruhidan o‘rin olgan Chexiya va Janubiy Afrika Respublikasi terma jamoalari o‘rtasidagi bahs yakunlandi. AQSHning Atlanta shahridagi “Mersedes-Bens” stadionida bo‘lib o‘tgan uchrashuv 1:1 hisobida durang bilan tugadi.

O‘yinda hisob 6-daqiqada ochildi. Chexiya yarim himoyachisi Mixal Sadilek jamoasini oldinga olib chiqdi. Janubiy Afrika Respublikasi esa uchrashuvning so‘nggi qismida muvozanatni tiklashga muvaffaq bo‘ldi. 83-daqiqada bosh hakam Tori Penso chexlar darvozasi tomon penalti belgiladi va Teboxo Mokoena undan samarali foydalanib, hisobni tenglashtirdi.

Shu tariqa, jamoalar bir ochkodan qo‘lga kiritdi. Ushbu guruh doirasidagi 2-bahsda Janubiy Koreya – Meksika qarama qarshiligi bo‘lib o‘tadi. O‘yin Toshkent vaqti bilan ertaga, 19 iyun kuni 6:00 da boshlanadi.

Ma’lumot uchun, “A” guruhining so‘nggi turida Chexiya terma jamoasi Meksikaga qarshi maydonga tushsa, Janubiy Afrika Respublikasi Janubiy Koreya bilan bahs olib boradi.