Чеферин UEFA президенти лавозимига яна номзодини қўймоқчи

Европа футбол ассоциациялари иттифоқи (UEFA) президенти Александер Чеферин яна бир бор ушбу лавозимга номзодини қўйиш ниятида. Бу ҳақда BBC хабар берди.

Манбага кўра, Чеферин ўз қарорини Берлинда бўлиб ўтган учрашувда ташкилот делегатларига маълум қилган.

Ўтган ойнинг бошида Копенгагенда бўлиб ўтган Европа клублари ассоциацияси йиғилишида “Пари Сен-Жермен” президенти Носир Ал-Хелайфий ҳам Чеферинни очиқ қўллаб-қувватлаб, уни яна бир муддатга номзодини қўйишга чақирган эди.

Маълумот учун, 58 ёшли Александер Чеферин 2016 йилдан буён UEFA’га раҳбарлик қилиб келмоқда. У бундан аввал Словения футбол ассоциацияси президенти бўлган. Агар қайта сайланса, Чеферин UEFA президенти сифатида тўртинчи муддатга иш бошлайди ва Европа футболига раҳбарлик қилишда давом этади.

Эслатиб ўтамиз, аввалроқ FIFA президенти Инфантино 2027 йил 18 март куни Работда бўлиб ўтадиган ташкилот президентлик сайловида яна бир муддатга номзодини қўйишини маълум қилган эди.